कुजबुज – मतात ‘फूट’ पडलीया की कुणी ‘गुपचूप’ मतदानाची पुडी सोडलीया?
फलटणच्या एसटी स्टँडमागच्या टपरीवर दुपारच्या उकाड्यात सखा चहाचा कप हातात घेऊन पेपर वाचत बसलाय. तेवढ्यात नाम्या खिशातून पानपराग काढत तिथं येतो.
सखा: काय रं नाम्या, ऐकलं का न्हाय? आपल्या सातारा-सांगली विधानपरिषदेचा निकाल लागला बघ! ‘कमळ’वाल्या दादांनी बाजी मारलीया. पण पेपरात आलंय की महायुतीची काही मतं फुटली हायती! आपल्या फलटण तालुक्यातूनच काही जणांनी ‘करेक्ट कार्यक्रम’ केल्याची दाट चर्चा हाय बाजारात!
नाम्या: आरं सख्या, राजकारण हाय भावा ते! इथं वरून गळाभेट आणि आतून ‘गुपचूप’ गेम चालतोय. पण संशयाची सुई कुणाकडं जातीया? आपल्याकडं तर दोनच मोठे गट हायती.
सखा: तेच तर! एक ‘माजी खासदार साहेबांचा’ गट आणि दुसरा ‘राजे’ गट. आता खासदार साहेब तर ‘देवेंद्र’ साहेबांचे एकदम जवळचे आणि खास माणसातले! त्यांच्याकडं एकवीस (२१) मतं हुती… त्यांनीच या इलेक्शनमध्ये सगळी फिल्डिंग लावली हुती, त्यामुळं त्यांची माणसं फुटणं तर काय शक्य वाटत न्हाय.
नाम्या: व्हय की! मग उरले ‘राजे’ गटाचे आणि आघाडीचे मिळून दहा (१०) शिलेदार! आरं सख्या, तुला मागची विधानपरिषदेची निवडणूक आठवतीया का न्हाय? तवा ‘राजेंच्या’ नेतृत्वात तो ‘युवा नेता’ उभा हुता, अन् त्याच्या विरोधात ‘काँग्रेसचे’ मोठे साहेब हुते. तवा बी असाच गेम झाला हुता!
सखा: (डोक्याला हात लावून) आरं कसं विसरणार! त्या युवा नेत्याला फलटणमधून मतंच पडली न्हवती अन् त्याचा दणकून पराभव झाला हुता. त्यानंतर त्या युवा नेत्यानं सजई मंगल कार्यालयात, खुद्द मोठ्या ‘पवार’ साहेबांच्या समोर कसा राडा घातला हुता, हे काय कुणापास्नं लपून राहिलंय व्हय?
नाम्या: बरोब्बर वळखलंस! तवापास्नं फलटणच्या राजकारणात कुणाचं मत कुणाला जाईल, हे खुद्द देवाला बी सांगता यायचं न्हाय! पण आता सोशल मीडियावर तर चर्चा हाय की, ‘राजे’ गटाच्या कार्यकर्त्यांनी म्हणे यंदा ‘पक्षाचा आदेश’ मानलाय!
सखा: (हसत) आरं येड्या, पक्षाचा आदेश मानला की स्वतःच्या मनाचा आदेश मानला, हे त्या मतपेटीलाच म्हायती! फलटणची स्वतंत्र मतं काही उघड झालेली न्हायीत. त्यामुळे नक्की कुणी कुणाची जिरवली आणि कुणी कुणाला तारलं, हे सध्या तरी गुलदस्त्यातच हाय!
नाम्या: खरंय भावा! इथं वरून समदे एकाच पंगतीत जेवत्यात आणि मतदानाच्या वेळेस कुणाच्या पानावर काय वाढायचं, हे आतल्या खोलीत ठरत्यात. आपण फक्त टपरीवर बसून चहा पेत कुजबुज करायची! म्हणूनच म्हणतो, नेत्यांच्या मतपेटीची काळजी करण्यापेक्षा, आपल्या रिकाम्या खिश्याकडं बघ! चल, चहाचे पैसे दे गुमान. नाहीतर टपरीवाला आपली ‘फूट’ पाडल!
दोघेही खळखळून हसतात आणि चहाचे पैसे देऊन एसटी स्टँडच्या दिशेने चालू लागतात. मतपेटीत दडलेलं गुपित मात्र गुलदस्त्यातच राहतं.
