फलटण: मुधोजी हायस्कूलमध्ये दीड हजार विद्यार्थ्यांची योगसाधना; आंतरराष्ट्रीय योग दिन उत्साहात
शिवाजीराजे क्रीडा संकुलात आंतरराष्ट्रीय योग दिन उत्साहात साजरा झाला. मुधोजी हायस्कूलच्या पंधराशे विद्यार्थ्यांनी योगसाधनेतून निरोगी आरोग्याचा संदेश दिला.
स्थैर्य, फलटण, दि. 23 जून : फलटण एज्युकेशन सोसायटी, योगरेखा योग इन्स्टिट्यूट आणि सुहासिनी योग यांच्या संयुक्त विद्यमाने शिवाजीराजे क्रीडा संकुलात आंतरराष्ट्रीय योग दिन मोठ्या उत्साहात साजरा करण्यात आला. यावेळी मुधोजी हायस्कूलच्या सुमारे दीड हजार विद्यार्थी आणि शंभर शिक्षकांनी एकाच वेळी योगासने करत निरोगी आरोग्याचा संदेश दिला.
या उपक्रमास सातारा जिल्हा परिषदेचे माजी अध्यक्ष संजीवराजे नाईक निंबाळकर, प्रशासन अधिकारी अरविंद निकम, मुंबईचे योगगुरू प्रवीण बांदकर, योग शिक्षक श्रुती शिंदे, प्रसाद म्हामूणकर, गायत्री शेटे आणि संयोजिका रेखा खिलारे प्रमुख पाहुणे म्हणून उपस्थित होते. संजीवराजे नाईक निंबाळकर यांच्या हस्ते प्रमुख पाहुण्यांचे स्वागत करण्यात आले.
दररोज योगसाधनेचे आवाहन
शारीरिक आणि मानसिक आरोग्य उत्तम राखण्यासाठी योगसाधनेची नितांत गरज असते, असे यावेळी संजीवराजे नाईक निंबाळकर म्हणाले. आहार, विहार आणि व्यायामाच्या अभावामुळे आरोग्य बिघडते. मात्र, योगामुळे शरीर लवचिक होते, रोगप्रतिकारशक्ती वाढते आणि ताणतणाव दूर होण्यास मदत होते. विद्यार्थ्यांनी केवळ योगदिनी नव्हे, तर दररोज योगसाधना करून निरोगी भारताचा संकल्प करावा, असे आवाहन त्यांनी केले.
मुधोजी हायस्कूलचे प्राचार्य वसंत शेडगे यांनी विद्यार्थ्यांना दैनंदिन जीवनात योगासने आणि प्राणायाम समाविष्ट करण्याचे महत्त्व समजावून सांगितले. यावेळी योगगुरू प्रवीण बांदकर आणि त्यांच्या सहकाऱ्यांनी वीरभद्रासन, ताडासन, वज्रासन, बद्ध कोणासन, कपालभाती, भ्रामरी प्राणायाम आणि सूर्यनमस्काराची प्रात्यक्षिके विद्यार्थ्यांकडून करून घेतली. तसेच, रेखा खिलारे यांच्या मार्गदर्शनाखाली विद्यार्थिनींच्या एका गटाने विशेष योग प्रात्यक्षिके सादर केली.
या उपक्रमास उपप्राचार्य सोमनाथ माने, पर्यवेक्षक रावसाहेब निंबाळकर, क्रीडा शिक्षक तुषार मोहिते, सचिन धुमाळ, भरत खिलारे, पत्रकार मोहन कदम आणि यशराज भांबुरे यांच्यासह मोठ्या संख्येने शिक्षक व विद्यार्थी उपस्थित होते.
