कृषी महाविद्यालयात नवोगतांचा ‘दीक्षारंभ’; विद्यार्थ्यांना मिळाली करिअरची दिशा
फलटणच्या कृषी महाविद्यालयात प्रथम वर्ष बी.एस्सी. (हॉनर्स) कृषीच्या नवोगत विद्यार्थ्यांचे ‘दीक्षारंभ’ कार्यक्रमात स्वागत करून शैक्षणिक संधींची माहिती देण्यात आली.
स्थैर्य, फलटण, दि. ०९ सप्टेंबर : कृषी महाविद्यालय, फलटण येथे शैक्षणिक वर्ष २०२६-२७ मधील प्रथम वर्ष बी.एस्सी. (हॉनर्स) कृषी पदवी अभ्यासक्रमातील नवोगत विद्यार्थ्यांचे ‘दीक्षारंभ’ कार्यक्रमांतर्गत स्वागत करण्यात आले. विद्यार्थ्यांना महाविद्यालयीन जीवन, शैक्षणिक संधी, शिस्त, विविध उपक्रम आणि व्यक्तिमत्त्व विकासाची ओळख करून देण्यात आली.
अभ्यासासोबत विविध उपक्रमांत सहभाग महत्त्वाचा
कृषी विस्तार विभागाचे सहाय्यक प्राध्यापक जी. बी. अडसूळ यांनी कार्यक्रमाचे प्रास्ताविक करताना कृषी शिक्षणातून आधुनिक कृषी क्षेत्रातील आव्हानांना सामोरे जाण्यासाठी आवश्यक ज्ञान, कौशल्ये आणि दृष्टिकोन विकसित करण्याची संधी मिळते, असे सांगितले. यावेळी विद्यार्थ्यांना महाविद्यालयातील विविध विभाग आणि प्राध्यापकांची ओळख करून देण्यात आली.
कृषी महाविद्यालय, बारामतीच्या चतुर्थ वर्षातील विद्यार्थिनी तन्वी मोरे यांनी ‘कृषी शिक्षणातील जडणघडण, खेळ आणि अभ्यास’ या विषयावर मार्गदर्शन केले. अभ्यासासोबत क्रीडा, सांस्कृतिक, सामाजिक आणि इतर उपक्रमांत सक्रिय सहभाग, वेळेचे नियोजन, सातत्यपूर्ण अभ्यास आणि सकारात्मक दृष्टिकोन महत्त्वाचा असल्याचे त्यांनी सांगितले.
करिअरसाठी आतापासून नियोजनाचा सल्ला
कृषी महाविद्यालय, फलटणचे माजी विद्यार्थी आदित्य कुंभार यांनी महाविद्यालयातील शैक्षणिक वातावरण, विविध उपक्रम आणि उपलब्ध संधींची माहिती दिली. विद्यार्थ्यांनी भविष्यातील करिअरसाठी आतापासूनच योग्य नियोजन करावे, असे त्यांनी सांगितले.
शिक्षण विभागप्रमुख जी. एस. धायगुडे यांनी कृषी पदवीच्या चार वर्षांत नियमित उपस्थिती, अभ्यासक्रमाचे आकलन, प्रात्यक्षिके, कृषी क्षेत्रातील प्रत्यक्ष अनुभव, शैक्षणिक शिस्त आणि महाविद्यालयीन नियमांचे पालन याकडे गांभीर्याने लक्ष देण्याचा सल्ला दिला.
आधुनिक तंत्रज्ञान आणि कौशल्यांवर भर
श्रीमंत शिवाजीराजे उद्यानविद्या महाविद्यालय, फलटणचे प्राचार्य एस. डी. निंबाळकर यांनी कृषी व उद्यानविद्या क्षेत्रातील बदल लक्षात घेऊन पारंपरिक ज्ञानासोबत आधुनिक तंत्रज्ञान, नवोपक्रम आणि कौशल्याधारित शिक्षण आत्मसात करण्याची गरज व्यक्त केली.
कृषी महाविद्यालयाचे प्राचार्य यु. डी. चव्हाण यांनी नवोगत विद्यार्थ्यांचे स्वागत केले. विद्यार्थ्यांनी महाविद्यालयातील शैक्षणिक सुविधा आणि विविध उपक्रमांचा लाभ घेऊन शिक्षकांच्या मार्गदर्शनातून कृषी क्षेत्रातील सक्षम व्यावसायिक म्हणून स्वतःची ओळख निर्माण करावी, असे त्यांनी सांगितले.
कार्यक्रमाला प्रथम वर्षातील विद्यार्थी, पालक आणि प्राध्यापक उपस्थित होते. विद्यार्थी कल्याण अधिकारी एस. आर. कश्यप यांनी सूत्रसंचालन केले.