ईएमआय आणि एसआईपी भरणे अधिक सोपे; एनपीसीआयने लाँच केली ‘इ-नाच लाईट’ सुविधा

ऑटो-डेबिटसाठी बाहेरील ब्राउझरवर न जाता थेट ॲपमधूनच अवघ्या काही सेकंदांत मॅंडेट सेट करण्यासाठी एनपीसीआयने नवी प्रणाली सुरू केली आहे.

स्थैर्य, सातारा, दि. १० सप्टेंबर : नॅशनल पेमेंट्स कॉर्पोरेशन ऑफ इंडियाने (NPCI) मुंबईतील ‘ग्लोबल फिनटेक फेस्ट २०२६’मध्ये ‘इ-नाच लाईट’ (eNACH Lite) ही नवी प्रगत सुविधा लाँच केली आहे. या तंत्रज्ञानामुळे डिजिटल ऑटो-डेबिट मॅंडेट सेट करणे अत्यंत सोपे आणि जलद होणार आहे. या सुविधेमुळे आता कर्जाचे हप्ते (EMI), म्युच्युअल फंड एसआयपी (SIP) किंवा विम्याचे प्रीमियम भरण्यासाठी ग्राहकांना कोणत्याही बाहेरील वेब पेजवर न जाता थेट संबंधित ॲपमधूनच प्रक्रिया पूर्ण करता येणार आहे.

बाहेरील ब्राऊझर रिडायरेक्शनच्या त्रासातून मुक्तता

पूर्वी कोणत्याही बँकिंग किंवा फिनटेक ॲपवर ऑटो-डेबिट मॅंडेट सेट करताना ग्राहकांना बाहेरील वेब ब्राऊझरवर रिडायरेक्ट केले जात होते. या प्रक्रियेत तांत्रिक अडचणींमुळे पेज क्रॅश होणे किंवा पेमेंट अयशस्वी होण्याचे प्रकार मोठ्या प्रमाणावर घडत असत. ‘इ-नाच लाईट’ या प्रणालीमुळे ही समस्या पूर्णपणे संपुष्टात आली असून आता मूळ ॲपच्या स्क्रीनवरच माहिती निवडून, कार्ड किंवा इतर उपलब्ध पर्यायांद्वारे ओटीपी प्रविष्ट करून काही सेकंदांत ई-मॅंडेट प्रक्रिया यशस्वीरीत्या पूर्ण करता येणार आहे.

सुरक्षितता वाढणार अन् तक्रारींचे प्रमाण घटणार

या नव्या सुविधेमुळे व्यवहार न होण्याच्या समस्येवर मोठा मार्ग निघाला असून बँकेच्या ग्राहक सेवा केंद्रांवरील ताण कमी होणार आहे. तसेच ग्राहकांची संवेदनशील माहिती थेट एनपीसीआयच्या सुरक्षित प्रणालीत प्रक्रिया केली जात असल्याने डेटा लीकचा धोका टळणार आहे. बँकांना या सुविधेसाठी वेगळे ॲप तयार करण्याची गरज नसून प्रमाणित तंत्रज्ञान पुरवठादारांच्या माध्यमातून ही यंत्रणा थेट उपलब्ध करून दिली जात आहे.