‘शालेय शिक्षणातून मराठ्यांचा इतिहास वगळणे दुर्दैवी’; एनसीईआरटीच्या निर्णयाविरोधात साताऱ्यात शुक्रवारी भव्य मोर्चा, वृषालीराजे भोसलेंचा इशारा

 इयत्ता आठवीच्या अभ्यासक्रमातून मराठा साम्राज्याचा नकाशा वगळल्याबद्दल वृषालीराजे भोसले यांनी ‘एनसीईआरटी’चा तीव्र निषेध केला आहे. या निर्णयाविरोधात साताऱ्यात शुक्रवारी  भव्य मोर्चा काढण्यात येणार आहे.

 स्थैर्य, सातारा, दि. २० : नॅशनल कौन्सिल ऑफ एज्युकेशन रिसर्च अँड ट्रेनिंग (NCERT) च्या इयत्ता आठवीमधील इतिहासाच्या अभ्यासक्रमातून मराठा साम्राज्याचा विस्तार दर्शवणारा नकाशा वगळण्यात आला आहे. शालेय शिक्षणातून मराठ्यांचा जाज्वल्य इतिहास वगळणे अत्यंत दुर्दैवी असून, या निर्णयाच्या निषेधार्थ साताऱ्यात येत्या शुक्रवारी (ता. २४) भव्य मोर्चा काढण्यात येणार आहे. या मोर्चात सर्व समाजघटकांनी मोठ्या संख्येने सहभागी व्हावे, असे आवाहन वृषालीराजे भोसले यांनी केले आहे.

शिवाजी सर्कल ते जिल्हाधिकारी कार्यालयापर्यंत मोर्चा

या वादग्रस्त निर्णयाच्या निषेधार्थ शुक्रवार, दि. २४ रोजी सकाळी ठीक १० वाजता साताऱ्यातील ‘शिवाजी सर्कल’ येथून जिल्हाधिकारी कार्यालयावर हा धडक मोर्चा काढण्यात येणार आहे. हा मोर्चा सर्वपक्षीय, सर्व जाती-धर्मीय आणि सर्व समाजघटकांचा असणार आहे.

‘मराठा सत्तेचा प्रभाव हे ऐतिहासिक सत्य’

वृषालीराजे भोसले म्हणाल्या, “मराठा साम्राज्याचा विस्तार दर्शवणाऱ्या नकाशात सुरुवातीला काही आक्षेप घेतल्यानंतर त्यात बदल करण्यात आले. मात्र, त्यानंतरही वाद कायम राहिल्याने अखेरीस संपूर्ण नकाशाच काढून टाकण्यात आला आहे. हा विषय केवळ एका नकाशापुरता मर्यादित नसून, तो इतिहासाच्या अचूकतेशी आणि शैक्षणिक प्रामाणिकतेशी जोडलेला आहे. भारतातील मराठा सत्तेचा विस्तार आणि प्रभाव हा देशाच्या इतिहासातील एक महत्त्वपूर्ण व सत्य भाग आहे.”

ऐतिहासिक नोंदी आणि दस्तऐवजांचा दाखला

मराठा साम्राज्याच्या विस्ताराबाबत इतिहासातील महत्त्वाचे दाखले देताना त्या म्हणाल्या:

• ऐतिहासिक नोंदी आणि उपलब्ध दस्तऐवजांनुसार, मराठ्यांचा प्रभाव थेट दिल्लीपर्यंत पोहोचला होता आणि पुढे अटकेपार विस्तार झाल्याचे स्पष्ट उल्लेख आढळतात.

  

• राजस्थानमधील मराठ्यांच्या मोहिमा आणि राजकीय हस्तक्षेप हेदेखील इतिहासात स्पष्टपणे नोंदवले गेले आहेत.

• ‘द राजपुताना गॅझेट’ (The Rajputana Gazette) यांसारख्या अधिकृत ऐतिहासिक दस्तऐवजांमध्ये मराठा सत्तेचा प्रभाव स्पष्टपणे नमूद करण्यात आलेला आहे.

विद्यार्थ्यांची दिशाभूल थांबवा; अन्यथा आंदोलन तीव्र करणार

अशा परिस्थितीत या ऐतिहासिक वास्तवाचे प्रतिनिधित्व करणारा नकाशा अभ्यासक्रमातून वगळणे, हे विद्यार्थ्यांपर्यंत दिशाभूल करणारी माहिती पोहोचवण्यास कारणीभूत ठरू शकते. या पार्श्वभूमीवर निघणाऱ्या या भव्य मोर्चानंतरही पुस्तकात हा भाग पुन्हा समाविष्ट न केल्यास, आगामी काळात हे आंदोलन अधिक तीव्र केले जाईल, असा सज्जड इशारा वृषालीराजे भोसले यांनी दिला आहे.