साताऱ्याला अवकाळी पावसाने झोडपले; उकाड्यापासून दिलासा, मात्र ‘हिंदकेसरी’ची तयारी आणि शेतीला मोठा फटका

स्थैर्य, सातारा, दि. १३ : सातारा शहर आणि परिसरात बुधवारी (१३ मे) सायंकाळी अचानक आलेल्या मुसळधार अवकाळी पावसाने अक्षरशः झोडपून काढले. सलग दोन दिवस ४२ ते ४३ अंश सेल्सिअस तापमानाचा सामना करणाऱ्या सातारकरांना या पावसामुळे काहीसा गारवा मिळाला असला तरी, अचानक आलेल्या वादळी पावसामुळे जनजीवन विस्कळीत झाले आहे. तसेच शेतीचे आणि आगामी ‘हिंदकेसरी’ स्पर्धेच्या तयारीचे मोठे नुकसान झाले आहे.

वातावरणातील बदल आणि पाऊस:

बुधवारी सकाळपासूनच प्रचंड उष्णता आणि वाढत्या तापमानामुळे नागरिक हैराण झाले होते. मात्र, दुपारी साडेतीनंतर अचानक आकाशात काळे ढग दाटून आले आणि सायंकाळी चारच्या सुमारास मेघगर्जनेसह जोरदार पावसाला सुरुवात झाली. विजेच्या कडकडाटासह आणि वादळी वाऱ्यासह तब्बल दीड तास चाललेल्या या पावसामुळे हवेत गारवा निर्माण झाला.

जनजीवन विस्कळीत:

पावसासोबतच सुरू असलेल्या विजेच्या लपंडावामुळे नागरिकांना घरातही उकाड्याचा प्रचंड त्रास सहन करावा लागला. शहरातील अनेक मुख्य रस्त्यांवरून पाण्याचे मोठे लोट वाहू लागल्याने रस्त्यांना तळ्यांचे स्वरूप आले होते. अचानक आलेल्या पावसामुळे कामावरून घरी परतणाऱ्या अनेक चाकरमान्यांची मोठी तारांबळ उडाली व त्यांना आडोसा शोधावा लागला.

‘हिंदकेसरी’ स्पर्धेच्या तयारीला व्यत्यय:

सातारा येथील श्रीमंत छत्रपती शाहू क्रीडा संकुलात गुरुवारपासून (१४ मे) राष्ट्रीय स्तरावरील भव्य ‘हिंदकेसरी’ कुस्ती स्पर्धेला प्रारंभ होत आहे. मात्र, या पावसामुळे मैदानावर सुरू असलेल्या स्टेज आणि प्रेक्षक गॅलरीच्या उभारणीच्या कामात मोठा व्यत्यय आला. गॅलरीचे काम निम्म्याहून अधिक पूर्ण झाले असताना अचानक आलेल्या पावसामुळे कामगारांना काम थांबवून सुरक्षित स्थळी आडोसा घ्यावा लागला.

शेतीचे मोठे नुकसान; बळीराजा चिंतेत:

या अवकाळी पावसाचा आणि वादळी वाऱ्याचा सर्वाधिक फटका साताऱ्यालगतच्या ग्रामीण भागातील शेतीला बसला आहे.

• आंबा उत्पादकांना फटका: परळी भागातील आंबा बागांचे मोठे नुकसान झाले असून, वादळामुळे झाडांखाली कैऱ्यांचा सडा पडलेला दिसून आला.

• भुईमूग आणि कांदा भिजला: काढणीला आलेल्या उन्हाळी भुईमुगासह इतर पिकांनाही या पावसाचा फटका बसला आहे. एकीकडे कांद्याचे दर गडगडले असतानाच, उघड्यावर वाळवणीसाठी ठेवलेला कांदा पावसात भिजल्याने कांदा उत्पादक शेतकरी मोठ्या चिंतेत सापडला आहे.