फलटणकरांसाठी महत्त्वाची माहिती: ७ जुलै रोजी ‘या’ भागात वीजपुरवठा राहणार खंडित
देखभाल दुरुस्तीच्या कामासाठी महावितरणकडून ७ जुलै रोजी फलटण शहरातील विविध भागांचा वीजपुरवठा सकाळी साडेदहा ते दुपारी साडेतीन वाजेपर्यंत खंडित ठेवण्यात येणार आहे.
स्थैर्य, फलटण, दि. ०६ जुलै : महावितरणच्या वतीने फलटण शहर आणि पंचक्रोशीला वीजपुरवठा करणाऱ्या २२ केव्ही फलटण फिडरवरील देखभाल दुरुस्तीच्या कामासाठी मंगळवारी (दि. ७ जुलै) परिसरातील वीजपुरवठा खंडित ठेवण्यात येणार आहे. सकाळी १०.३० ते दुपारी ३.३० या वेळेत हे काम चालणार असल्याने नागरिकांनी याची नोंद घ्यावी, असे आवाहन करण्यात आले आहे.
देखभाल दुरुस्ती आणि ट्री कटिंगचे काम
नागरिकांना सुरळीत वीजपुरवठा करता यावा, यासाठी महावितरणकडून उच्चदाब (एचटी) वाहिनीवरील देखभाल दुरुस्तीचे काम हाती घेण्यात आले आहे. या कामांतर्गत वाहिनीला अडथळा ठरणार्या झाडांच्या फांद्या तोडण्याचे (ट्री कटिंग) कामही केले जाणार आहे. त्यामुळे सुरक्षिततेच्या कारणास्तव या फिडरवरील वीजपुरवठा बंद ठेवण्याचा निर्णय प्रशासनाने घेतला आहे.
‘या’ परिसरातील वीजपुरवठा राहणार बंद
मंगळवारी सकाळी १०.३० ते दुपारी ३.३० या वेळेत शहरातील विद्यानगर, संजीवराजे नगर, बिरदेव नगर, हाडको कॉलनी, भडकमकर नगर आणि पद्मावती नगर या भागातील वीजपुरवठा बंद राहील. यासोबतच दत्तनगर, बारस्कर गल्ली, शुक्रवार पेठ, शनी नगर आणि संपूर्ण मलठण परिसरातील नागरिकांनाही वीजकपातीला सामोरे जावे लागणार आहे.
