मुख्यमंत्र्यांच्या भेटीने फलटणकरांच्या अपेक्षा उंचावल्या! रणजितदादांच्या नेतृत्वात फलटण झळकणार जगाच्या नकाशावर!

स्थैर्य, फलटण, दि. २३ जुलै : काल राज्याचे मुख्यमंत्री देवेंद्र फडणवीस यांनी पंढरपूर दौऱ्यादरम्यान फलटणला दिलेली विशेष भेट आणि परतीच्या प्रवासात माजी खासदार रणजितसिंह नाईक निंबाळकर यांच्या विंचुरणी येथील फार्म हाऊसवर अत्यंत साध्या व घरगुती पद्धतीने साजरा केलेला वाढदिवस, यामुळे रणजितदादांचे मुख्यमंत्र्यांशी असलेले सलोख्याचे संबंध पुन्हा एकदा संपूर्ण राज्यासमोर सिद्ध झाले आहेत. या राजकीय वजनामुळे आणि मुख्यमंत्र्यांच्या भक्कम पाठिंब्यामुळे आता फलटणकर जनतेच्या रणजितदादांकडून असलेल्या विकासाच्या अपेक्षा आणखी वाढल्या आहेत. गेल्या काही वर्षांत दादांनी फलटणचा जो कायापालट केला आहे ते पाहता, जनतेच्या या वाढलेल्या अपेक्षा पूर्णत्वास नेण्याची ताकद आणि प्रबळ इच्छाशक्ती केवळ त्यांच्याकडेच आहे, असा ठाम विश्वास आता व्यक्त केला जात आहे.

विमानतळ: २५०० मीटरच्या धावपट्टीसह फलटण थेट जगाच्या नकाशावर!

नुकतेच रणजितदादांनी फलटणमध्ये डोमेस्टिक विमानतळ उभारण्याचा मानस व्यक्त केला होता. त्याबाबतचा अधिकृत प्रस्ताव महाराष्ट्र राज्य हवाई विभागाने तयार करून कालच मुख्यमंत्री देवेंद्र फडणवीस यांच्यासमोर सादर केला.

या प्रस्तावावर चर्चा करताना मुख्यमंत्र्यांनी फलटणच्या विकासासाठी एक ऐतिहासिक निर्णय घेतला. संपूर्ण महाराष्ट्रात नसेल असा तब्बल २५०० मीटरचा भव्य ‘रनवे’ (धावपट्टी) फलटणमध्ये बनवण्याचे तातडीचे निर्देश त्यांनी दिले आहेत. यामुळे भविष्यात होणारे फलटणचे विमानतळ सुरुवातीला केवळ ‘डोमेस्टिक’ (देशांतर्गत) राहिले तरी, गरजेनुसार येथे थेट आंतरराष्ट्रीय विमाने सुद्धा सहज उतरू शकतील. या एका निर्णयामुळे फलटणचे नाव केवळ देशाच्याच नव्हे, तर जगाच्या नकाशावर सुवर्णाक्षरांनी कोरले जाणार आहे.

वडिलांचे स्वप्न पूर्ण! फलटण बनणार रेल्वेचे ‘हब’

फलटणला रेल्वे सुरू करण्याचे मूळ स्वप्न हे लोकनेते स्वर्गीय हिंदुराव नाईक निंबाळकर यांचे होते. त्यासाठी त्यांनी आपल्या काळात मोठा पाठपुरावा केला होता. आपल्या वडिलांचे हेच अपूर्ण स्वप्न आता माजी खासदार रणजितसिंह नाईक निंबाळकर यांनी खऱ्या अर्थाने पूर्ण करून दाखवले आहे.

• बारामती-फलटण रेल्वे: येणाऱ्या काही महिन्यांतच फलटण ते बारामती या रेल्वेमार्गाचे काम पूर्णत्वास जाईल. त्यानंतर फलटणमध्ये रेल्वेचे अत्यंत मोठे जाळे विणले गेलेले दिसेल.

• वाहतुकीत मोठा बदल: हे काम पूर्ण झाल्यावर बारामतीवरून पुण्याकडे जाणाऱ्या सर्व रेल्वे गाड्या फलटणमार्गे मार्गस्थ होतील.

• वेळ आणि पैशांची मोठी बचत: तसेच बंगळुरू, कर्नाटक, सांगली आणि सातारा या मार्गांवरून दौंडकडे जाणाऱ्या सर्व लांब पल्ल्याच्या गाड्या आता पुण्याला न जाता थेट फलटणमार्गे पुढे मार्गस्थ होतील. यामुळे रेल्वेचा वेळ आणि प्रवाशांचा पैसा या दोन्ही गोष्टींची मोठी बचत होणार आहे.

• फलटण-पंढरपूर मार्ग: यासोबतच ‘फलटण-पंढरपूर’ हा महत्त्वाकांक्षी रेल्वे प्रकल्प पूर्ण ताकतीने मार्गी लावण्यासाठी दादा कटिबद्ध आहेत.

हे सर्व भव्य प्रकल्प दादांच्याच दूरदृष्टीतून साकारत आहेत. विकासकामांचा हा झंझावात पाहता, येणाऱ्या काळात जनतेच्या अपेक्षा कितीही वाढल्या तरी, फलटणला राज्यातील सर्वात प्रगत तालुका बनवण्याची आणि जनतेची प्रत्येक अपेक्षा पूर्णत्वास नेण्याची ताकद रणजितदादांच्या नेतृत्वात नक्कीच आहे.