गणेशोत्सवात मोदक, मिठाईचा गोडवा महागणार; साखरेच्या दरात प्रतिकिलो ७ रुपयांची वाढ
गणेशोत्सवाच्या पार्श्वभूमीवर साखरेच्या भावात वाढ झाल्याने यंदा मिठाईचे दर १० ते १५ टक्क्यांनी वाढल्याने ग्राहकांच्या खिशाला चाट बसणार आहे.
स्थैर्य, सातारा, दि. ०९ सप्टेंबर : गणेशोत्सवाच्या तोंडावर सर्वसामान्यांच्या खिशाला महागाईचा मोठा फटका बसण्याची शक्यता निर्माण झाली आहे. बाजारात साखरेचे दर वाढल्यामुळे यंदा गणेशोत्सवातील मोदक, पेढे आणि विविध मिठाईचे पदार्थ १० ते १५ टक्क्यांनी महागले आहेत. गेल्या वर्षीच्या तुलनेत साखरेच्या दरात प्रतिकिलो थेट ७ रुपयांची वाढ झाल्याने मिठाई उत्पादकांनी भाववाढ करण्याचा निर्णय घेतला आहे.
साखरेची भाववाढ आणि उत्पादनावर परिणाम
गेल्या काही महिन्यांपासून कच्च्या साहित्याचे भाव वाढल्याने खाद्यपदार्थ उत्पादकांचा निर्मिती खर्च मोठ्या प्रमाणात वाढला आहे. गेल्या वर्षीच्या तुलनेत यंदा किरकोळ बाजारात साखरेचे दर प्रतिकिलो ७ रुपयांनी वधारले आहेत. साखरेसोबतच दूध, मावा आणि ड्रायफ्रूट्सच्या किमतीतही वाढ झाल्यामुळे मिठाई उत्पादकांना दरांमध्ये वाढ करणे भाग पडले असल्याचे व्यावसायिकांचे म्हणणे आहे.
गणेशोत्सवातील खरेदीवर ग्राहकांना अतिरिक्त भार
गणेशोत्सवाच्या काळात बाप्पाच्या नैवेद्यासाठी आणि गौरी-गणपती सणासाठी मोदक तसेच पेढ्यांना मोठी मागणी असते. मात्र, मिठाईच्या दरात १० ते १५ टक्क्यांपर्यंत वाढ झाल्याने नागरिकांचे सणासुदीचे बजेट कोलमडणार आहे. या दरवाढीमुळे यंदाच्या सण-उत्सवाच्या काळात गोडधोड खरेदी करताना ग्राहकांना जादा मोजावे लागणार आहेत.
