फलटण: रवींद्र कर्वे यांना यंदाचा ‘उष:काल सन्मान’ जाहीर – सोहळा २८ जूनला
ठाणे येथील सेवा सहयोग फाउंडेशनच्या विद्यार्थी विकास योजनेचे प्रवर्तक रवींद्र कर्वे यांना यंदाचा उष:काल सन्मान पुरस्कार जाहीर झाला आहे.
स्थैर्य, फलटण, दि. १८ जून : फलटण येथील प्रसिद्ध शिक्षिका व ज्योतिष तज्ज्ञ कै. सौ. उषा दाणी-विभूते यांच्या स्मृतीप्रित्यर्थ दिला जाणारा ‘उष:काल सन्मान २०२६’ यंदा ठाणे येथील रवींद्र कर्वे यांना जाहीर झाला आहे. कर्वे हे सेवा सहयोग फाउंडेशनच्या विद्यार्थी विकास योजनेचे प्रवर्तक म्हणून कार्यरत आहेत. २८ जून रोजी फलटण येथे आयोजित विशेष समारंभात हा पुरस्कार प्रदान करण्यात येणार आहे.
पुरस्काराचे स्वरूप आणि वितरण
या पुरस्काराचे स्वरूप शाल, श्रीफळ, स्मृतिचिन्ह व रोख रक्कम असे आहे. पुणे येथील प्रसिद्ध ज्येष्ठ साहित्यिक व कवी डॉ. सुनील देवधर यांच्या शुभहस्ते हा सन्मान प्रदान करण्यात येणार असून, फलटणचे प्रसिद्ध अस्थिरोग तज्ज्ञ डॉ. प्रसाद जोशी या कार्यक्रमाचे अध्यक्षस्थान भूषवणार आहेत. रविवार, दिनांक २८ जून रोजी सकाळी १०:३० वाजता मारवाड पेठ येथील नवलबाई मंगल कार्यालय येथे हा सोहळा निमंत्रितांच्या उपस्थितीत पार पडणार आहे.
पुरस्काराची गौरवशाली परंपरा
उष:काल प्रतिष्ठान, फलटण यांच्या वतीने २०१७ सालापासून हा पुरस्कार दिला जातो. यापूर्वी डॉ. माधवराव पोळ, डॉ. अविनाश पोळ, डॉ. प्रियदर्शिनी कर्वे, अरुण करमरकर, अंजलीताई देशपांडे, ॲड. विश्वनाथ टाळकुटे आणि हेमंतजी बेडेकर या विविध क्षेत्रांतील दिग्गजांना या पुरस्काराने सन्मानित करण्यात आले आहे. यंदा रवींद्र कर्वे यांच्या सामाजिक क्षेत्रातील भरीव योगदानाची दखल घेऊन त्यांची या पुरस्कारासाठी निवड करण्यात आली आहे.
