फलटण नगरपरिषदेत ‘एकल महिला दिवस’ साजरा; विविध योजनांचे मार्गदर्शन
फलटण नगरपरिषदेत आंतरराष्ट्रीय विधवा दिनानिमित्त ‘एकल महिला दिवस’ साजरा करण्यात आला. महिलांना रोजगार, स्वयंरोजगार व शासकीय योजनांची माहिती देण्यात आली.
स्थैर्य, फलटण, दि. २५ जून : संयुक्त राष्ट्र संघाने निश्चित केलेल्या आंतरराष्ट्रीय विधवा दिनाचे औचित्य साधून फलटण नगरपरिषदेच्या कार्यालयात ‘एकल महिला दिवस’ कार्यक्रमाचे आयोजन करण्यात आले होते. “विधवा” या शब्दाऐवजी “एकल महिला” या संज्ञेचा वापर करून शहरातील एकल महिलांना सन्मानाने या कार्यक्रमासाठी निमंत्रित करण्यात आले होते.
याप्रसंगी उपस्थित महिलांचे स्वागत करून महात्मा जोतीराव फुले यांच्या २०० व्या जयंती वर्षानिमित्त त्यांच्या प्रतिमेचे पूजन करण्यात आले. या कार्यक्रमात महिलांना शासकीय स्तरावरील कामकाजाची माहिती, रोजगार, स्वयंरोजगार, उपजीविका आणि महिला बचत गटांच्या माध्यमातून उपलब्ध होणाऱ्या रोजगाराच्या संधींविषयी सविस्तर मार्गदर्शन करण्यात आले. तसेच समाजातील अनिष्ट रूढी-परंपरांबाबत जनजागृती करण्यात आली.
यावेळी एनयूएलएम (NULM) विभागप्रमुख शशिकांत शिरतोडे यांनी बचत गट कार्यपद्धती आणि पीएम स्ट्रीट व्हेंडर आत्मनिर्भर निधी या योजनांची माहिती दिली. महिला व बालकल्याण समिती सभापती मोहिनी हेंद्रे यांनी ‘संडे बझार’ या उपक्रमाबाबत मार्गदर्शन करत महिलांना यामध्ये सहभागी होण्याचे आवाहन केले. मागासवर्गीय दुर्बल घटक कल्याणकारी समिती सभापती सुपर्णा अहिवळे यांनी महिलांनी स्वतःसाठी वेळ देण्याचे महत्त्व सांगत कोणत्याही योजनेबाबत अडचण आल्यास नगरपरिषदेशी संपर्क साधण्याचे आवाहन केले.
या कार्यक्रमास मीना काकडे, स्वाती भोसले यांच्यासह शहरातील बचत गटातील महिला प्रतिनिधी व एकल महिला मोठ्या संख्येने उपस्थित होत्या, अधिकृत माहिती या प्रेस नोटमध्ये देण्यात आली आहे.
