वाई-खंडाळा-महाबळेश्वरच्या आरोग्य प्रश्नांवर मंत्रालयात निर्णायक बैठक; ना. मकरंद पाटील यांच्या पाठपुराव्याला मोठे यश
थेट WhatsApp वर मिळवा
वाई-खंडाळा-महाबळेश्वर मतदारसंघातील ग्रामीण भागातील आरोग्य प्रश्नांवर मंत्रालयात महत्त्वाची बैठक पार पडली. मंत्री मकरंद पाटील यांच्या पुढाकारामुळे महाबळेश्वर रुग्णालयाचे श्रेणीवर्धन आणि रिक्त पदे भरण्यावर सकारात्मक चर्चा झाली.
स्थैर्य, सातारा (प्रतिनिधी), दि. ७ : वाई-खंडाळा-महाबळेश्वर मतदारसंघातील ग्रामीण भागातील आरोग्य सुविधांचे प्रश्न मार्गी लावण्यासाठी मदत व पुनर्वसन मंत्री ना. मकरंद पाटील यांनी केलेल्या सातत्यपूर्ण पाठपुराव्याला अखेर मोठे यश आले आहे. त्यांच्या पुढाकारातून मुंबई येथील मंत्रालयात राज्याचे सार्वजनिक आरोग्य व कुटुंब कल्याण मंत्री ना. प्रकाश आबिटकर यांच्या उपस्थितीत वरिष्ठ आरोग्य अधिकाऱ्यांसोबत एक महत्त्वपूर्ण व निर्णायक बैठक नुकतीच पार पडली.
या बैठकीत मतदारसंघातील ग्रामीण रुग्णालये व प्राथमिक आरोग्य केंद्रांतील अपुऱ्या सुविधा, रिक्त पदे आणि आरोग्य व्यवस्थेच्या बळकटीकरणाबाबत सविस्तर व सकारात्मक चर्चा करण्यात आली.
बैठकीतील प्रमुख मुद्दे आणि मागण्या :
महाबळेश्वर ग्रामीण रुग्णालयाचे श्रेणीवर्धन: ग्रामीण रुग्णालय महाबळेश्वरचे श्रेणीवर्धन करून तेथे अत्याधुनिक वैद्यकीय सुविधा उपलब्ध करण्याचा विषय या बैठकीत प्राधान्याने मांडण्यात आला. यामध्ये आधुनिक निदान केंद्र, तज्ज्ञ डॉक्टरांची उपलब्धता, अत्याधुनिक उपकरणे आणि आपत्कालीन सेवा सक्षम करण्यावर विशेष भर देण्यात आला.
प्राथमिक आरोग्य केंद्रांतील गैरसोयी: बोपर्डी व उडतारे (ता. वाई), भादे (ता. खंडाळा) आणि कुंभरोशी (ता. महाबळेश्वर) येथील प्राथमिक आरोग्य केंद्रांमध्ये असलेली मनुष्यबळाची कमतरता, अपुऱ्या वैद्यकीय सुविधा आणि रुग्णसेवेत येणाऱ्या अडचणींचा मुद्दा ना. मकरंद पाटील यांनी ठामपणे मांडला.
रिक्त पदभरतीला गती: ग्रामीण भागातील नागरिकांना प्राथमिक उपचारांसाठी मोठ्या अंतराचा प्रवास करावा लागतो. त्यामुळे वाई व खंडाळा तालुक्यातील ग्रामीण रुग्णालयांतर्गत रिक्त पदे, तसेच वाई, खंडाळा आणि महाबळेश्वर तालुका आरोग्य अधिकारी कार्यालयांतर्गत प्रलंबित असणारी पदभरती तातडीने पूर्ण करण्याची आग्रही मागणी करण्यात आली. यावर संबंधित वरिष्ठ अधिकाऱ्यांनी सकारात्मक प्रतिसाद देत कार्यवाही गतिमान करण्याचे संकेत दिले.
ना. मकरंद पाटील यांची ठाम भूमिका :
“ग्रामीण भागातील नागरिकांना आरोग्य सेवांसाठी कोणत्याही प्रकारचा त्रास सहन करावा लागू नये. दुर्गम भागातील प्रत्येक नागरिकाला शहरांप्रमाणे दर्जेदार वैद्यकीय सुविधा मिळाल्याच पाहिजेत. यासाठी शासन स्तरावर आवश्यक त्या सर्व बाबींसाठी आपण सातत्याने पाठपुरावा करणार आहोत.”
– ना. मकरंद पाटील (मदत व पुनर्वसन मंत्री, महाराष्ट्र राज्य)
या उच्चस्तरीय बैठकीमुळे वाई-खंडाळा-महाबळेश्वर मतदारसंघातील आरोग्य सुविधांच्या उन्नतीचा मार्ग मोकळा होण्याची चिन्हे असून, ना. मकरंद पाटील यांच्या या सक्रिय पाठपुराव्यामुळे ग्रामीण भागातील नागरिकांना लवकरच मोठा दिलासा मिळण्याची अपेक्षा व्यक्त होत आहे.
