महात्मा एज्युकेशन सोसायटीतर्फे स्वातंत्र्यदिन उत्साहात साजरा; विद्यार्थ्यांच्या कलागुणांचे कौतुक
फलटणमधील महात्मा एज्युकेशन सोसायटीच्या वतीने स्वातंत्र्याचा ७९वा वर्धापन दिन उत्साहात साजरा करण्यात आला. प्रा. विकास शिंदे यांच्या हस्ते ध्वजारोहण झाले.
स्थैर्य, फलटण, दि. १६ ऑगस्ट : भारतीय स्वातंत्र्याच्या ७९व्या वर्धापन दिनानिमित्त महात्मा एज्युकेशन सोसायटीच्या वतीने चतुराबाई शिंदे बालक मंदिर, श्रीराम विद्यामंदिर आणि आचार्य बाळशास्त्री जांभेकर विद्यालयाच्या संयुक्त विद्यमाने ध्वजारोहण समारंभ उत्साहात पार पडला.
विद्यार्थ्यांच्या कलागुणांचे कौतुक
भारतीय पत्रकार संघाचे जिल्हाध्यक्ष प्रा. विकास शिंदे यांच्या हस्ते ध्वजारोहण करण्यात आले. यावेळी ते म्हणाले, प्रशालेतील विद्यार्थ्यांच्या अंगी असलेल्या विविध कलागुणांचे दर्शन आज घडले. विद्यार्थ्यांना गुणवत्तापूर्ण शिक्षण देण्यासाठी प्रयत्नशील असलेल्या शिक्षकवृंदाचे काम अत्यंत कौतुकास्पद आहे.
मान्यवरांची प्रमुख उपस्थिती
कार्यक्रमाच्या अध्यक्षस्थानी महात्मा एज्युकेशन सोसायटीचे सेक्रेटरी रवींद्र बेडकीहाळ उपस्थित होते. तसेच संस्थेचे उपाध्यक्ष शांताराम आवटे, शालेय समितीच्या अध्यक्षा अलका बेडकीहाळ, रवींद्र बर्गे, ज्ञानेश्वर पिसाळ यांच्यासह परिसरातील अनेक पत्रकार आणि नागरिक मोठ्या संख्येने उपस्थित होते.
उत्कृष्ट संयोजन
चतुराबाई शिंदे बालक मंदिरच्या मुख्याध्यापिका सुरेखा सोनवणे, श्रीराम विद्यामंदिरचे मुख्याध्यापक मनीष निंबाळकर आणि आचार्य बाळशास्त्री जांभेकर विद्यालयाचे मुख्याध्यापक अरुण खरात यांच्या मार्गदर्शनाखाली या उपक्रमाचे आयोजन करण्यात आले.
