आता ‘ॲप’ न बदलता होणार आधार फेस ऑथेंटिकेशन; युआयडीएआयकडून नवी सुविधा सुरू

ग्लोबल फिनटेक फेस्टमध्ये युआयडीएआयने आधार फेस ऑथेंटिकेशन एसडीके आणि सँडबॉक्स सुविधा लाँच केली आहे.

स्थैर्य, सातारा, दि. १० सप्टेंबर : आधार पडताळणीची प्रक्रिया अधिक सुलभ आणि सुरक्षित करण्यासाठी भारतीय विशिष्ट ओळख प्राधिकरणाने (UIDAI) मोठे पाऊल उचलले आहे. ‘ग्लोबल फिनटेक फेस्ट २०२६’ मध्ये युआयडीएआयने ‘आधार फेस ऑथेंटिकेशन एसडीके’ (Software Development Kit) आणि ‘फेस ऑथेंटिकेशन सँडबॉक्स’ लाँच केले आहे. या नव्या सुविधेमुळे आता बँकिंग, विमा किंवा ब्रोकिंग ॲप्स वापरताना नागरिकांना आधार चेहरा पडताळणीसाठी दुसऱ्या कोणत्याही बॅकग्राउंड ॲपवर जाण्याची गरज उरणार नाही.

थेट मूळ ॲपमधूनच होणार पडताळणी

सध्या कोणत्याही बँकिंग किंवा फिनटेक ॲपवर डिजिटल केवायसी करताना आधार चेहरा पडताळणीसाठी ‘फेसआरडी’ (FaceRD) या वेगळ्या ॲपवर जावे लागत होते. मात्र, या नव्या एसडीके तंत्रज्ञानामुळे बँका आणि वित्तीय संस्थांना त्यांच्या मूळ ॲपमध्येच चेहरा पडताळणीची सुविधा थेट जोडता येणार आहे. यामुळे डिजिटल ऑनबोर्डिंग प्रक्रिया जलद आणि विनाअडथळा पूर्ण होणार आहे.

आधुनिक एआय आणि अँटी-स्पूफिंग सुरक्षा

या प्रणालीमध्ये कृत्रिम बुद्धिमत्ता (AI) आणि मशीन लर्निंगवर आधारित लाइव्हनेस तपासणी समाविष्ट करण्यात आली आहे. त्यामुळे डिजिटल स्वाक्षरीतील त्रुटी आणि स्पूफिंगसारख्या फसवणुकीच्या प्रकारांना आळा बसणार आहे. याशिवाय, संस्थांना ही प्रणाली प्रत्यक्ष लागू करण्यापूर्वी तपासण्यासाठी सँडबॉक्स व्यासपीठही उपलब्ध करून देण्यात आले आहे.