जीवनातील ‘रियल हिरो’ आई वडील – वसंत हंकारे

दैनिक स्थैर्य | दि. १५ सप्टेंबर २०२३ | बारामती |
चित्रपटातील हिरो हे दिखाऊ असतात; परंतु कठीण परिस्थितीत टिकाऊपणा दाखवून मुलांना यश मिळवून देण्यासाठी प्रत्यनांची पराकाष्ठा करणारे आई-वडील हेच प्रत्येकाच्या जीवनातील ‘रियल हिरो’ असल्याचे प्रतिपादन व्याख्याते व प्रबोधनकार वसंत हंकारे यांनी केले.

लडकत सायन्स अकॅडमीच्या वतीने नीट, जेईई, सीईटी, एनडीए व इतर परीक्षेत यशस्वी झालेल्या विद्यार्थ्यांचा गुणगौरव समारंभप्रसंगी हंकारे बोलत होते.

याप्रसंगी लडकत सायन्स अकॅडमीचे संचालक प्रा. नामदेव लडकत, प्रा. गणेश लडकत, दत्तात्रय लडकत व जलसंपदा विभागाचे अभियंता चंद्रशेखर लडकत, प्राचार्य रामचंद्र वाघ, राज भरणे, अ‍ॅड. अनिल फडतरे आदी मान्यवर उपस्थित होते.

आई-वडिलांचे कष्ट समजून घ्या, मान खाली घालण्यास भाग पाडू नका, मोबाईल कामापुरता वापरा, असा सल्लाही वसंत हंकारे यांनी विद्यार्थ्यांना दिला.

सर्व अत्यावश्यक शैक्षणिक सुविधा देत, गुणवत्ता व दर्जात्मक शिक्षण देत विद्यार्थ्यांना त्यांच्या स्वप्नातील यश प्रत्यनांच्या व अचूक मार्गदर्शनाच्या माध्यमातून मिळवून देण्यासाठी लडकत सायन्स अकॅडमी कटिबद्ध असल्याचे प्रा. नामदेव लडकत यांनी सांगितले.

अनुभवी प्राध्यापक वर्ग, सर्व अत्याधुनिक शैक्षणिक साहित्य व अभ्यास करवून घेण्याच्या पद्धती यामुळे अवघड वाटणारा अभ्यास सहजसोपा वाटतो. त्यामुळे स्पर्धात्मक युगात सुद्धा सहज लक्ष्य गाठता आल्याचे यशस्वी विद्यार्थ्यांनी मनोगतात सांगितले.

विद्यार्थी व पालक यांचा आत्मविश्वास तर लडकत सायन्स अकॅडमीचे अचूक मार्गदर्शन, यामुळे यशस्वी विद्यार्थ्यांचा टक्का दिवसेंदिवस वाढत असल्याचे प्रा. गणेश लडकत यांनी सांगितले.

यावेळी यशस्वी विद्यार्थ्यांच्या पालकांनीसुद्धा मनोगत व्यक्त केले.

अनिल सावळे-पाटील यांनी सूत्रसंचालन केले. प्रफुल्ल आखाडे यांनी आभार मानले.