फलटण: कोळकीत श्रामणेर शिबिराची सांगता – धम्मप्रसाराचा निर्धार
कोळकी (ता. फलटण) येथील बुद्ध विहारात भारतीय बौद्ध महासभेच्या वतीने आयोजित दहा दिवसीय श्रामणेर शिबिराची भंते धम्मानंद बोधी यांच्या उपस्थितीत उत्साहात सांगता करण्यात आली.
स्थैर्य, फलटण, दि. ८ मे : भारतीय बौद्ध महासभा शाखा फलटण तालुक्याच्या वतीने कोळकी येथील बुद्ध विहारात आयोजित करण्यात आलेल्या दहा दिवसीय श्रामणेर शिबिराची गुरुवारी (दि. ७ मे) सांगता करण्यात आली. भंते धम्मानंद बोधी यांच्या मार्गदर्शनाखाली २८ एप्रिलपासून हे शिबीर सुरू होते. या शिबिरात सहभागी झालेल्या नऊ उपासकांनी श्रामणेर दीक्षा घेत धम्म, शिस्त, करुणा आणि समतेचे धडे गिरवले.
९ उपासकांनी घेतली श्रामणेर दीक्षा:
या शिबिरामध्ये माळशिरस तालुक्यातील मोरोची गावच्या तीन आणि फलटण व खंडाळा तालुक्यातील सहा अशा एकूण नऊ युवकांनी श्रामणेर दीक्षा घेतली. दहा दिवस चाललेल्या या शिबिरात त्यांना सामाजिक बांधिलकी आणि मैत्रीभावनेचे सखोल प्रशिक्षण देण्यात आले. सांगता समारंभाच्या अध्यक्षस्थानी भारतीय बौद्ध महासभा फलटण तालुक्याचे अध्यक्ष भीमराव लोंढे उपस्थित होते.
धम्माचा विचार घरोघरी पोहोचवा:
समता सैनिक दलाचे असिस्टंट स्टाफ ऑफिसर तथा राज्याचे संघटक दादासाहेब भोसले यांनी यावेळी मार्गदर्शन केले. ते म्हणाले, “ज्या गावांमध्ये अजून भारतीय बौद्ध महासभा पोहोचलेली नाही, त्या प्रत्येक गावात आपण धम्माचा प्रचार-प्रसार केला पाहिजे. भगवान बुद्धांचा ‘बहुजन हिताय, बहुजन सुखाय’ हा संदेश समाजाच्या तळागाळापर्यंत पोहोचवणे हीच खरी धम्मसेवा आहे.”
केंद्रीय शिक्षिका सुजाता गायकवाड यांनी धम्मपदातील गाथांचा संदर्भ देत मार्गदर्शन केले. शुद्ध आणि प्रसन्न मनाने कार्य केल्यास सुख सावलीप्रमाणे कायम सोबत राहते, असे त्यांनी स्पष्ट केले. तसेच, केंद्रीय शिक्षक श्रीमंतराव घोरपडे यांनी भगवान बुद्धांनी अंधश्रद्धेपेक्षा प्रज्ञेला महत्त्व दिल्याचे सांगून शिबिरार्थींना समाजात बंधुभाव निर्माण करण्याचे आवाहन केले.
‘सिक्खा पच्चक्खान’ विधी आणि प्रमाणपत्र वाटप:
तालुका संघटक श्रीनिवास धाईंजे आणि शिवाजी सावंत यांनी मनोगत व्यक्त करताना शिबिराच्या यशस्वीतेसाठी घेतलेल्या कष्टांची माहिती दिली. अध्यक्षीय समारोपात भीमराव लोंढे यांनी हे यश सर्व कार्यकर्त्यांच्या सामूहिक प्रयत्नांचे असल्याचे सांगून भिक्षु संघ आणि सहकार्य करणाऱ्या सर्वांप्रती कृतज्ञता व्यक्त केली.
समारोपप्रसंगी भंते धम्मानंद बोधी यांच्या उपस्थितीत बौद्ध परंपरेनुसार ‘सिक्खा पच्चक्खान’ (शिक्षेचा त्याग) हा विधी पार पडला. ज्या श्रामणेर भिक्षूंना पुन्हा गृहस्थ जीवन स्वीकारायचे होते, त्यांनी विधिवत चिवर उतरवून बुद्ध, धम्म आणि संघाला वंदन केले. यानंतर सर्व श्रामणेर भिक्षूंना प्रमाणपत्रांचे वितरण करण्यात आले. या कार्यक्रमाचे सूत्रसंचालन केशव ठोंबरे यांनी केले.
