ज्येष्ठ पत्रकार राजू परुळेकरांना ‘फुले-आंबेडकर साहित्य पुरस्कार’ जाहीर; शरद पवारांच्या हस्ते होणार वितरण

 भारतीय भटके विमुक्त विकास व संशोधन संस्थेच्या वतीने दिला जाणारा ३४ वा फुले-आंबेडकर साहित्य पुरस्कार ज्येष्ठ पत्रकार राजू परुळेकर यांना जाहीर झाला आहे. जकातवाडी येथे ९ मे रोजी या पुरस्कारांचे वितरण होणार आहे.

स्थैर्य, सातारा, दि. २२ : भारतीय भटके विमुक्त विकास व संशोधन संस्थेच्या वतीने दिला जाणारा प्रतिष्ठेचा ‘फुले-आंबेडकर साहित्य पुरस्कार’ ज्येष्ठ पत्रकार राजू परुळेकर यांना  जाहीर झाला आहे. रोख २५ हजार रुपये आणि सन्मानचिन्ह असे या पुरस्काराचे स्वरूप आहे. संस्थेचे कार्याध्यक्ष लक्ष्मण माने यांनी एका पत्रकार परिषदेत या ३४ व्या फुले-आंबेडकर साहित्य पुरस्कारासह अन्य पुरस्कारांची घोषणा केली.

जकातवाडीत रंगणार पुरस्कार वितरण सोहळा

येत्या ९ मे रोजी संस्थेचे अध्यक्ष शरद पवार यांच्या हस्ते दुपारी एक वाजता जकातवाडी (ता. सातारा) येथील ‘शारदाबाई पवार आश्रमशाळेत’ हा पुरस्कार वितरण कार्यक्रम पार पडणार आहे. या पत्रकार परिषदेस संस्थेचे सचिव नारायण जावलीकर, उपाध्यक्ष मच्छिंद्रनाथ जाधव, खजिनदार हरिदास जाधव उपस्थित होते.

यंदाच्या पुरस्कारांचे मानकरी आणि स्वरूप :

• फुले-आंबेडकर साहित्य पुरस्कार : ज्येष्ठ पत्रकार राजू परुळेकर (रोख २५ हजार रुपये व सन्मानचिन्ह)

• जीवनगौरव पुरस्कार : शिवलाल जाधव, भटक्या विमुक्त संघटनेचे नेते, मुंढवा (रोख १५ हजार रुपये व सन्मानचिन्ह)

  

• विशेष जीवनगौरव पुरस्कार : गणेश काळे, पारधी समाजाचे नेते व भटक्या विमुक्त जमाती संघटनेचे जिल्हा उपाध्यक्ष, कोल्हापूर (रोख १५ हजार रुपये व सन्मानचिन्ह)

  

• यल्लाप्पा वैदू युवा साहित्य पुरस्कार : डॉ. प्रकाश जाधव, निलंगा (रोख १० हजार रुपये व सन्मानचिन्ह)

लक्ष्मण माने यांची केंद्र सरकारवर जोरदार टीका

या पत्रकार परिषदेत महिला विधेयकाच्या प्रश्नावर बोलताना लक्ष्मण माने यांनी सत्ताधाऱ्यांवर कडाडून टीका केली.

ते म्हणाले, “२०२३ मध्ये महिला विधेयक मंजूर झाले आहे. त्यावेळी २०२९ मध्ये ते लागू करू, असे केंद्र सरकारने स्पष्ट केले होते. मग, आता मोदी-शहा यांना पुन्हा त्याची मंजुरी कशासाठी हवी होती? मशीनच्या जिवावर निवडणूक जिंकणाऱ्यांना लोकशाहीचे महत्त्व नाही. आता केरळ, पश्चिम बंगाल येथेही मशीनच्या जिवावर ते जिंकतील; पण लोकांची मने जिंकण्यात त्यांना अपयश येत असल्याचे आपण सातत्याने पाहत आहोत.”