फलटण: मुधोजी क्लबवर ‘रॉयल्स कप फुटबॉल स्पर्धे’चा दिमाखदार शुभारंभ
फलटण येथे माजी आमदार दीपक चव्हाण यांच्या हस्ते ‘रॉयल्स कप फुटबॉल स्पर्धा २०२६’ चे थाटात उद्घाटन; परदेशी खेळाडूंचाही स्पर्धेत सहभाग.
स्थैर्य, फलटण, दि. १३ जून : फलटण एज्युकेशन सोसायटी, फलटण जिमखाना आणि फलटण एज्युकेशन सोसायटी स्पोर्ट कमिटी यांच्या संयुक्त विद्यमाने आयोजित ‘रॉयल्स कप फुटबॉल स्पर्धा २०२६’ चा उद्घाटन सोहळा मुधोजी क्लब येथे शुक्रवारी संध्याकाळी मोठ्या उत्साहात पार पडला. १२ ते १४ जून दरम्यान चालणाऱ्या या स्पर्धेत देशभरातील नामांकित खेळाडूंसह परदेशी खेळाडूही मैदानात उतरले आहेत.
उद्घाटन सोहळा आणि मान्यवरांची उपस्थिती
या भव्य स्पर्धेचे उद्घाटन माजी आमदार दीपक चव्हाण यांच्या हस्ते करण्यात आले. या कार्यक्रमाच्या अध्यक्षस्थानी सातारा जिल्हा परिषदेचे माजी अध्यक्ष श्रीमंत संजीवराजे नाईक निंबाळकर होते. यावेळी शिवाजीराव घोरपडे आणि अमित काळे यांची प्रमुख उपस्थिती होती.
याशिवाय, मुधोजी महाविद्यालयाचे प्राचार्य डॉ. पी. एच. कदम, मुधोजी हायस्कूलचे प्राचार्य व्ही. के. शेडगे, कृषी महाविद्यालयाचे प्राचार्य डॉ. एस. डी. निंबाळकर, इंजिनिअरिंग कॉलेजचे प्राचार्य डॉ. एम. व्ही. दळवी आणि श्रीमंत शिवाजीराजे इंग्लिश मीडियम स्कूलच्या प्राचार्या एम. एस. दीक्षित आदी मान्यवर विशेष अतिथी म्हणून उपस्थित होते.
सामन्यांची वेळ आणि बक्षीस वितरण
मुधोजी क्लबच्या मैदानावर १४ जूनपर्यंत दररोज सकाळी ८ ते रात्री १० या वेळेत हे रोमांचक सामने खेळविले जाणार आहेत. या स्पर्धेचा बक्षीस वितरण समारंभ रविवार, १४ जून रोजी सायंकाळी ८ वाजता पार पडणार आहे. आमदार दीपक चव्हाण व संजीवराजे नाईक निंबाळकर यांच्या हस्ते विजेत्या संघांना गौरविण्यात येईल.
अतिशय उच्च दर्जाच्या फुटबॉल सामन्यांचा अनुभव फलटणकरांना मिळत असून, या क्रीडा सोहळ्याचा आनंद घेण्यासाठी नागरिकांनी व क्रीडाप्रेमींनी मोठ्या संख्येने उपस्थित राहावे, असे आवाहन आयोजकांनी केले आहे.
