पिंपरद: प्राजक्ता शिंदे यांची महसूल सहायकपदी निवड – सर्वत्र कौतुक
पिंपरद येथील प्राजक्ता शिंदे यांची राज्य लोकसेवा आयोगाच्या परीक्षेतून महसूल सहायकपदी निवड झाली आहे. प्रतिकूल परिस्थितीवर मात करत त्यांनी हे यश मिळवले आहे.
स्थैर्य, पिंपरद, दि. ०९ जून : फलटण तालुक्यातील पिंपरद येथील प्राजक्ता लक्ष्मण शिंदे यांची नुकतीच राज्य लोकसेवा आयोगाच्या (MPSC) परीक्षेमधून महसूल सहायकपदी निवड झाली आहे. अतिशय प्रतिकूल परिस्थितीवर मात करत जिद्द आणि चिकाटीच्या जोरावर त्यांनी हे घवघवीत यश संपादन केले आहे.
शैक्षणिक वाटचाल
प्राजक्ता या पिंपरद ग्रामपंचायतचे सदस्य हनुमंत शिंदे यांच्या पुतणी आहेत. त्यांचे प्राथमिक शिक्षण जिल्हा परिषद केंद्रशाळा पिंपरद येथे, तर माध्यमिक शिक्षण सिद्धेश्वर हायस्कूल पिंपरद येथे झाले. त्यानंतर त्यांनी मुधोजी महाविद्यालय फलटण येथून आपले उच्च माध्यमिक शिक्षण पूर्ण केले.
मान्यवरांकडून अभिनंदन
प्राजक्ता शिंदे यांनी मिळवलेल्या या यशाबद्दल फलटण कृषी उत्पन्न बाजार समितीचे संचालक किरण शिंदे पाटील, पिंपरदच्या सरपंच स्वाती भगत, उपसरपंच सागर बोराटे, सोसायटी चेअरमन राजेंद्र ढमाळ, व्हाईस चेअरमन विठ्ठल भगत आणि पोलीस पाटील सुनील बोराटे यांच्यासह छावा ग्रुपचे कार्यकर्ते आणि पिंपरद ग्रामस्थांकडून त्यांचे अभिनंदन करण्यात येत आहे.
