एसटी पास काढायचाय? फलटणकरांसाठी महत्त्वाची माहिती, २४ जूनला विशेष कॅम्प
माऊली फाउंडेशनतर्फे फलटणमध्ये २४ जूनला एसटी स्मार्ट कार्ड कॅम्प आयोजित करण्यात आला आहे. महिला व ज्येष्ठांनी लाभ घेण्याचे आवाहन सिद्धाली शहा यांनी केले.
स्थैर्य, फलटण, दि. 20 जून : माऊली फाउंडेशनच्या वतीने फलटणमध्ये बुधवार, २४ जून रोजी महिला, ज्येष्ठ नागरिक आणि विद्यार्थ्यांसाठी एसटी स्मार्ट कार्ड नोंदणीच्या विशेष कॅम्पचे आयोजन करण्यात आले आहे. ज्यांनी अद्याप कार्ड काढलेले नाही, त्यांनी या सुविधेचा लाभ घेण्याचे आवाहन नगरसेविका सिद्धाली शहा यांनी केले आहे.
कॅम्पचा लाभ कोणाला मिळणार?
ज्या महिलांनी अद्याप एसटी प्रवासासाठी आवश्यक असलेले स्मार्ट कार्ड काढलेले नाही, त्यांच्यासाठी हा कॅम्प अत्यंत उपयुक्त ठरणार आहे. यासोबतच ६५ वर्षांवरील पुरुष ज्येष्ठ नागरिक आणि शालेय तसेच महाविद्यालयीन विद्यार्थी यांनाही या कॅम्पमध्ये कार्ड काढण्याची सुविधा उपलब्ध करून देण्यात आली आहे. नगरसेविका सिद्धाली शहा यांच्या कार्यालयात हा कॅम्प पार पडेल.
एक हजार कार्डचे लवकरच वाटप
माऊली फाउंडेशनच्या माध्यमातून नागरिकांना एसटी पास आणि स्मार्ट कार्ड मिळवून देण्यासाठी सातत्याने पाठपुरावा केला जात आहे. आतापर्यंत या फाउंडेशनच्या माध्यमातून शहरातील सुमारे एक हजार नागरिकांचे स्मार्ट कार्ड काढण्यात आले आहेत. तयार झालेल्या या सर्व कार्डचे लवकरच वाटप करण्यात येणार असल्याची माहिती शहा यांनी दिली.
