फलटण: किसाबाई कांबळे यांचा प्रथम स्मृतिदिन धम्ममय वातावरणात संपन्न – पर्यावरण संवर्धनाचा संदेश
कालकथित किसाबाई जगन्नाथ कांबळे यांच्या प्रथम स्मृतिदिनानिमित्त आयोजित कार्यक्रम कोणत्याही कर्मकांडांना फाटा देत बौद्ध धम्माच्या संस्कार पद्धतीनुसार पार पडला. यावेळी पर्यावरणाचे रक्षण करण्याचा आणि बोधिवृक्ष लावण्याचा संदेश देण्यात आला.
स्थैर्य, फलटण, दि. २८ मे : फलटण येथे कालकथित किसाबाई जगन्नाथ कांबळे यांच्या प्रथम स्मृतिदिनानिमित्त आयोजित कार्यक्रम अत्यंत धम्ममय वातावरणात संपन्न झाला. कोणत्याही प्रकारच्या अंधश्रद्धा, कर्मकांड किंवा जुन्या अवैज्ञानिक चालीरीतींना थारा न देता, बौद्ध धम्माच्या विचार आणि संस्कार पद्धतीनुसार हा विधी पार पडला. भारतीय बौद्ध महासभा शाखा फलटण तालुक्याचे माजी अध्यक्ष आयु. महावीर भालेराव यांनी हा विधी संपन्न केला.
पर्यावरण संवर्धनाचा आणि धम्म आचरणाचा संदेश
यावेळी उपस्थितांना मार्गदर्शन करताना महावीर भालेराव म्हणाले की, “बौद्ध धम्म हा नीतिमान, निर्मळ व विवेकपूर्ण जीवन जगण्याचा मार्ग आहे. आपल्या पूर्वजांच्या, आप्तेष्टांच्या व कुटुंबीयांच्या स्मृती जतन करण्यासाठी स्मृतिस्थळे निर्माण व्हावीत आणि त्या परिसरात पर्यावरणाचे रक्षण करणाऱ्या वृक्षांचे, विशेषतः बोधिवृक्षाचे रोपण करून गेलेल्या व्यक्तींच्या आठवणी जपल्या पाहिजेत.” मनुष्य आपल्या कुशल कर्मांमुळेच समाजात स्मरणात राहतो. त्यामुळे प्रत्येकाने बौद्ध धम्माच्या आचरणासह पर्यावरण संवर्धनाची सामूहिक जबाबदारी स्वीकारली पाहिजे, असे त्यांनी स्पष्ट केले.
किसाबाईंच्या कष्टमय जीवनाला उजाळा
भालेराव यांनी कालकथित किसाबाई यांच्या कष्टमय जीवनावर प्रकाश टाकत, त्यांनी अपार कष्टातून आपल्या नऊ मुलांचा सांभाळ केल्याचे सांगितले. माता रमाई आंबेडकर यांच्या स्मृतिदिनाच्या पार्श्वभूमीवर त्यांनी माता रमाई यांच्या त्यागमय जीवनाची आणि किसाबाई यांच्या संघर्षमय जीवनाची तुलना करत दोघींच्या कष्टमय प्रवासातील साम्य अधोरेखित केले. याप्रसंगी लोकप्रसिद्ध शाहीर महावीर शिंदे यांनी आपल्या गीतांच्या माध्यमातून समाजप्रबोधन करत किसाबाईंच्या कष्टमय जीवनावर प्रकाश टाकला.
बुद्धगया भेटीची पूर्ण झालेली इच्छा
किसाबाई यांची बुद्धांच्या विचारांवर नितांत श्रद्धा होती आणि त्यांची एकदा तरी बुद्धगया येथे जाण्याची इच्छा होती. त्यांची ही इच्छा त्यांचे सुपुत्र राहुल कांबळे यांनी २००६ मध्ये पूर्ण केली होती. बुद्धांच्या विचारांवर चालणारे त्यांचे जीवन समाजासाठी प्रेरणादायी आहे, अशी भावना यावेळी व्यक्त करण्यात आली.
याप्रसंगी अनेक मान्यवरांनी कालकथित किसाबाई यांच्या आठवणींना उजाळा देत त्यांना विनम्र अभिवादन केले. कार्यक्रमाला त्यांचे कुटुंबीय कैलास कांबळे, राहुल कांबळे, विजय कांबळे, संजय कांबळे यांच्यासह बौद्ध उपासक-उपासिका, भारतीय बौद्ध महासभेचे आजी-माजी पदाधिकारी व ग्रामस्थ मोठ्या संख्येने उपस्थित होते.
