फलटणमध्ये लवकरच भव्य कोर्ट इमारत उभारणार; रणजितदादांचे आश्वासन
फलटण वकील संघाच्या नूतन पदाधिकाऱ्यांनी माजी खासदार रणजितसिंह नाईक निंबाळकर यांची भेट घेतली. यावेळी शहरात भव्य कोर्ट इमारत उभारण्याचे आश्वासन देण्यात आले.
स्थैर्य, फलटण, दि. 18 जुलै : फलटण वकील संघाच्या नूतन कार्यकारिणीने माजी खासदार रणजितसिंह नाईक निंबाळकर, आमदार सचिन पाटील आणि स्वराज पतसंस्थेचे चेअरमन अभिजित नाईक निंबाळकर यांची सदिच्छा भेट घेतली. यावेळी प्रलंबित प्रश्नांवर चर्चा करण्यात आली असून, फलटणमध्ये लवकरच भव्य कोर्ट इमारत उभारण्याचे आश्वासन रणजितसिंह नाईक निंबाळकर यांनी दिले.
भव्य कोर्ट इमारतीचा प्रस्ताव
वकील संघाच्या प्रलंबित प्रश्नांवर विशेष लक्ष देण्याची मागणी यावेळी करण्यात आली. त्यावर रणजितसिंह नाईक निंबाळकर यांनी सकारात्मक प्रतिसाद दिला. फलटण शहर व तालुक्याचा चेहरामोहरा आपण बदलणार असून येणाऱ्या काही वर्षांत फलटणची ओळख देशाच्या नकाशावर होईल, असे ते म्हणाले. फलटण येथे सर्व सोयी-सुविधांनी युक्त अशी भव्य आणि देखणी कोर्ट इमारत बांधण्याचा मानस त्यांनी व्यक्त केला. तसेच, यासंदर्भातील मागणीचा प्रस्ताव शासनाकडे दिला असल्याची माहितीही त्यांनी यावेळी दिली.
नूतन कार्यकारिणीचा सहभाग
फलटण वकील संघाच्या २०२६-२७ या वर्षासाठी निवडण्यात आलेल्या नूतन पदाधिकाऱ्यांनी या सदिच्छा भेटीत सहभाग घेतला. या कार्यकारिणीमध्ये अध्यक्षपदी ॲड. उमेश कदम, उपाध्यक्षपदी ॲड. मेघा अहिवळे, सचिवपदी ॲड. अनिरुद्ध सस्ते, सहसचिवपदी ॲड. शारदा दीक्षित, खजिनदारपदी ॲड. शाम अहिवळे, तर सदस्यपदी ॲड. चैत्राली शिंदे आणि ॲड. रोहिणी भंडलकर यांचा समावेश आहे. सर्व नूतन पदाधिकाऱ्यांनी या भेटीत वकील संघाच्या विकासाबाबत चर्चा केली.
