दिलासा: आमदार सचिन पाटलांच्या पाठपुराव्याला यश; फलटणसाठी कालव्यातून पिण्याचे पाणी उपलब्ध

आमदार सचिन पाटील यांनी विधानसभेत पाणीप्रश्नावर आवाज उठवल्यानंतर प्रशासनाने तातडीने दखल घेत नीरा उजवा कालव्यातून फलटण शहर व उपनगरांसाठी पिण्याचे पाणी सोडले आहे.

स्थैर्य, फलटण, दि. ०६ जुलै : आमदार सचिन पाटील यांनी विधानसभेत फलटण शहर आणि परिसरातील पाणीटंचाईचा मुद्दा उपस्थित केल्यानंतर प्रशासनाने याची तातडीने दखल घेतली आहे. नीरा उजवा कालव्याच्या माध्यमातून फलटण शहर व उपनगरांसाठी पिण्याचे पाणी सोडण्यात आले असून, यामुळे नागरिकांना मोठा दिलासा मिळाला आहे.

विधानसभेतील पाठपुराव्याला यश

दोन दिवसांपूर्वी सचिन पाटील यांनी विधानसभेत फलटण शहरासह परिसरातील पिण्याच्या पाण्याच्या गंभीर परिस्थितीकडे सरकारचे लक्ष वेधले होते. या प्रश्नाचे गांभीर्य लक्षात घेऊन पाटबंधारे विभागाने तातडीने पावले उचलत नीरा उजवा कालव्यातून पिण्याचे पाणी उपलब्ध करून दिले आहे.

शेतीच्या पाण्याचेही आश्वासन

सध्या पिण्याच्या पाण्याचा प्रश्न मार्गी लागला आहे. आगामी काळात पावसाने योग्य साथ दिल्यास पिण्याच्या पाण्यासोबतच शेतीसाठीही कालव्यातून पाणी सोडले जाईल, असे महत्त्वपूर्ण आश्वासन पाटबंधारे विभागाने आमदार सचिन पाटील यांना दिले आहे.

पालखी सोहळ्यासाठी विशेष निर्देश

आगामी काळात श्री संत ज्ञानेश्वर महाराज पालखी सोहळा पार पडणार आहे. या सोहळ्याच्या पार्श्वभूमीवर फलटण शहरासह तालुक्यातील नागरिकांना आणि वारकऱ्यांना पिण्याच्या व वापरण्याच्या पाण्याची कोणतीही कमतरता भासू नये. यासाठी पाण्याचे योग्य नियोजन करून पुरवठा सुरळीत ठेवावा, असे स्पष्ट निर्देश आमदार सचिन पाटील यांनी पाटबंधारे विभागाला दिले आहेत.