जिंतीतील धार्मिक स्थळात चोरी; ३२ हजारांचा मुद्देमाल लंपास करणारा संशयित ताब्यात

जिंती येथील एका धार्मिक स्थळातील पितळी साहित्य चोरीप्रकरणी फलटण ग्रामीण पोलिसांनी २२ वर्षीय संशयिताला ताब्यात घेतले असून पुढील तपास सुरू आहे.

स्थैर्य, फलटण, दि. ०६ सप्टेंबर : जिंती येथील एका धार्मिक स्थळातून सुमारे ३२ हजार रुपयांचे पितळी साहित्य चोरीला गेल्याप्रकरणी फलटण ग्रामीण पोलिसांनी पिंपळवाडी येथील २२ वर्षीय संशयिताला ताब्यात घेतले आहे. तांत्रिक आणि गोपनीय माहितीच्या आधारे पोलिसांनी ही कारवाई केली.

तांत्रिक माहितीच्या आधारे तपास

फिर्यादी हरिप विठ्ठल कोळपे (रा. कोळपेवस्ती, पिंपळवाडी, ता. फलटण) यांनी दिलेल्या फिर्यादीनुसार, जिंती गावाच्या हद्दीतील एका धार्मिक स्थळातून पितळी समई, पितळी घंटा व इतर साहित्य असा सुमारे ३२ हजार रुपयांचा मुद्देमाल ०३ सप्टेंबर रोजी सायंकाळी ७ ते ०४ सप्टेंबर रोजी सकाळी ११ वाजण्याच्या दरम्यान अज्ञात चोरट्याने चोरून नेला. याप्रकरणी फलटण ग्रामीण पोलीस ठाण्यात गुन्हा दाखल करण्यात आला होता.

२२ वर्षीय संशयित ताब्यात

गुन्ह्याचा तपास पोलीस अधीक्षक निखिल पिंगळे, अपर पोलीस अधीक्षक वैशाली कडूकर आणि उपविभागीय पोलीस अधिकारी धन्यकुमार गोडसे यांच्या सूचनेनुसार करण्यात आला. फलटण ग्रामीण पोलीस ठाण्याचे प्रभारी अधिकारी प्रशांत सुबनावळ आणि पोलीस उपनिरीक्षक शिवानी नागवडे यांच्या मार्गदर्शनाखाली तपास पथकाने कारवाई केली.

तपासात जय संजय वेदपाठक (वय २२, रा. पिंपळवाडी, ता. फलटण) याला ०५ सप्टेंबर रोजी रात्री १२.२० वाजता ताब्यात घेण्यात आले. न्यायालयाने त्याला ०७ सप्टेंबरपर्यंत पोलीस कोठडी दिली असून, पुढील तपास फलटण ग्रामीण पोलीस करत आहेत.