रणवीरराजेंच्या नियोजनातून गजानन चौकात दहिहंडीचा जल्लोष; गोखळीच्या जय हनुमान गोविंदा पथकाने फोडली दहिहंडी
फलटणच्या गजानन चौकात आयोजित भव्य दहिहंडीत तरुणाईचा मोठा उत्साह पाहायला मिळाला. गोखळीच्या जय हनुमान पथकाने पाच थर लावत हंडी फोडण्याचा मान पटकावला.
स्थैर्य, फलटण, दि. ०७ सप्टेंबर : युवा नेते रणवीरराजे समशेरसिंह नाईक निंबाळकर यांच्या पुढाकारातून शहरातील गजानन चौकात आयोजित करण्यात आलेल्या भव्य दहिहंडी उत्सवाने फलटणकरांच्या उत्साहाला नवा रंग चढवला. आकर्षक विद्युत रोषणाई, दर्जेदार ध्वनिव्यवस्था, हजारोंच्या संख्येने उपस्थित तरुणाई आणि चोख नियोजनामुळे यंदाची दहिहंडी विशेष चर्चेचा विषय ठरली. या उत्सवात गोखळी (ता. फलटण) येथील जय हनुमान गोविंदा पथकाने तब्बल 7 थरांचा मानवी मनोरा उभारून दहिहंडी फोडण्याचा मान पटकावला. विजेत्या पथकाचा माजी खासदार रणजितसिंह नाईक निंबाळकर यांच्या हस्ते पारितोषिक देऊन गौरव करण्यात आला.
स्वस्तिक फाऊंडेशन आणि रणवीरराजे नाईक निंबाळकर मित्र मंडळाच्या वतीने शहरातील मुख्य चौकांपैकी एक असलेल्या गजानन चौकात या दहिहंडी सोहळ्याचे आयोजन करण्यात आले होते. दहिहंडीच्या निमित्ताने संपूर्ण परिसराला उत्सवी स्वरूप प्राप्त झाले होते. विशेषतः तरुणाईचा उत्साह आणि गोविंदा पथकांचा जोश यामुळे वातावरणात चैतन्य निर्माण झाले. दहिहंडी फोडण्यासाठी पथकांकडून सुरू असलेल्या प्रयत्नांना उपस्थितांनी उत्स्फूर्त दाद दिली.
या संपूर्ण सोहळ्याचे वैशिष्ट्य ठरले ते रणवीरराजे नाईक निंबाळकर यांनी केलेले नियोजन
पारंपरिक दहिहंडीला आधुनिक आयोजनाची जोड देत त्यांनी कार्यक्रमाची भव्यता आणि तरुणांचा सहभाग यांचा सुरेख मेळ साधला. कार्यक्रमस्थळी करण्यात आलेली आकर्षक विद्युत रोषणाई, प्रभावी ध्वनिव्यवस्था, उपस्थितांसाठी करण्यात आलेली व्यवस्था आणि कार्यक्रमाच्या प्रत्येक टप्प्यावर ठेवण्यात आलेले नियोजन यामुळे दहिहंडी उत्सवाला एक वेगळाच उठाव मिळाला. त्यामुळे केवळ दहिहंडी फोडण्याचा कार्यक्रम न राहता तो फलटणच्या तरुणाईचा उत्सव ठरला.
रणवीरराजे यांच्या या उपक्रमातून तरुणांना एकत्र आणण्याची आणि पारंपरिक उत्सवांना नव्या स्वरूपात लोकसहभागाची जोड देण्याची त्यांची कार्यपद्धती पुन्हा एकदा दिसून आली. कार्यक्रमस्थळी उपस्थित असलेल्या तरुणांमध्ये त्यांच्याबद्दलचा उत्साहही प्रकर्षाने जाणवत होता. नियोजनबद्ध आयोजन आणि उत्साहपूर्ण वातावरणामुळे गजानन चौकात दहिहंडी पाहण्यासाठी फलटण शहरासह परिसरातील नागरिकांनी मोठी गर्दी केली होती.
यावेळी माजी खासदार रणजितसिंह नाईक निंबाळकर, आमदार सचिन पाटील, नगराध्यक्ष समशेरसिंह नाईक निंबाळकर, सातारा जिल्हा मध्यवर्ती सहकारी बँकेचे संचालक श्रीमंत शिवरुपराजे खर्डेकर, युवा नेते अभिजीत नाईक निंबाळकर यांच्यासह नगरपालिकेचे विविध विषय समित्यांचे सभापती, आजी-माजी नगरसेवक तसेच भारतीय जनता पक्ष व राष्ट्रवादी काँग्रेसचे पदाधिकारी उपस्थित होते.