३० वर्षांपासून धूळ खात पडून असलेल्या झिरपवाडी ग्रामीण रुग्णालयासाठी दशरथ फुलेंचा लढा; उच्च न्यायालयात जनहित याचिका दाखल

फलटण-गिरवी रस्त्यावरील झिरपवाडी येथे १९९२ साली बांधलेले ग्रामीण रुग्णालय गेली ३० वर्षे बंद आहे. याविरोधात ज्येष्ठ सामाजिक कार्यकर्ते दशरथ फुले यांनी उच्च न्यायालयात धाव घेत जनहित याचिका दाखल केली असून, रुग्णालय सुरू होईपर्यंत लढा देणार असल्याचा निर्धार व्यक्त केला आहे.

स्थैर्य, फलटण, दि. 27 एप्रिल : फलटण-गिरवी रस्त्यावरील झिरपवाडी येथे १९९२ साली सुमारे ८० लाख रुपये खर्चून बांधण्यात आलेले ग्रामीण रुग्णालय गेली तब्बल ३० वर्षे बंद अवस्थेत आहे. डॉक्टर आणि कर्मचाऱ्यांअभावी या रुग्णालयाची सुसज्ज इमारत केवळ धूळ खात पडून आहे. या गंभीर प्रश्नाकडे शासनाचे लक्ष वेधण्यासाठी आणि हे रुग्णालय परिसरातील नागरिकांसाठी तातडीने सुरू व्हावे, यासाठी ज्येष्ठ सामाजिक कार्यकर्ते दशरथ सदाशिव फुले यांनी आता थेट मुंबई उच्च न्यायालयात (Bombay High Court) जनहित याचिका (PIL) दाखल केली आहे.

३० हजार लोकसंख्येची मोठी गैरसोय:

या रुग्णालयाचा फायदा झिरपवाडीसह आजूबाजूच्या सुमारे १५ ते २० गावांमधील तब्बल ३० हजार लोकसंख्येला होणार होता. मात्र, रुग्णालय पूर्णपणे बंद असल्याने या परिसरातील नागरिकांना वैद्यकीय उपचारांसाठी मोठा नाहक त्रास सहन करावा लागत आहे. गंभीर आजारी रुग्णांना किंवा अपघातग्रस्तांना उपचारासाठी थेट २५ किलोमीटर अंतरावर असलेल्या फलटण शहरात किंवा सातारा येथे हलवावे लागते. वेळेवर वैद्यकीय मदत न मिळाल्यास रुग्णांच्या जिवावर बेतण्याची शक्यता असते, तरीही प्रशासन आणि लोकप्रतिनिधी याकडे जाणीवपूर्वक डोळेझाक करत आहेत.

‘जिल्ह्यात ४ मंत्री असूनही रुग्णालय बंद, ही शोकांतिका’:

प्रशासकीय आणि राजकीय अनास्थेवर तीव्र खंत व्यक्त करताना दशरथ फुले म्हणाले की, “सध्या सातारा जिल्ह्याला राज्य मंत्रिमंडळात ४ मंत्री आणि १ उपमुख्यमंत्री लाभले आहेत. जिल्ह्याला एवढे मोठे राजकीय वजन आणि पाठबळ असूनही गेल्या ३० वर्षांपासून सर्वसामान्यांच्या हक्काचे हे ग्रामीण रुग्णालय सुरू होऊ शकलेले नाही, ही जिल्ह्यासाठी अत्यंत मोठी शोकांतिका आहे.”

‘रुग्णालय चालू होईपर्यंत लढा सुरूच राहणार’:

“झिरपवाडीचे हे ग्रामीण रुग्णालय जोपर्यंत सर्वसामान्यांच्या उपचारांसाठी प्रत्यक्ष चालू होत नाही, तोपर्यंत आपला हा लढा अविरत सुरूच राहणार आहे. न्यायव्यवस्थेवर आपला पूर्ण विश्वास असून, या प्रकरणात सन्माननीय उच्च न्यायालय नक्कीच योग्य आणि जनहिताचा निर्णय देईल. या रुग्णालयासाठी आपण अखेरपर्यंत कायदेशीर लढा देणार आहोत,” असा ठाम विश्वास आणि निर्धार दशरथ फुले यांनी व्यक्त केला आहे.