नगराध्यक्ष समशेरसिंहांनी घालून दिला प्रगल्भ राजकारणाचा नवा आदर्श; विरोधी पक्षातील नगरसेवकाच्या घरी जाऊन केले महामानवाला अभिवादन
स्थैर्य, फलटण, दि. १४ एप्रिल : राजकारणात अलीकडच्या काळात अनेकदा कटुता आणि टोकाचे मतभेद पाहायला मिळतात. परंतु, फलटणमध्ये आज एका वेगळ्या आणि अत्यंत सकारात्मक राजकीय संस्कृतीचे दर्शन घडले. ‘राजकारण हे केवळ निवडणुकीपुरते आणि राजकीय मंचापुरते मर्यादित असावे, एरवी आपण सर्वजण एकच आहोत’ हा विचार केवळ न बोलता कृतीतून सिद्ध करत, फलटण नगरपरिषदेचे लोकनियुक्त नगराध्यक्ष समशेरसिंह नाईक निंबाळकर यांनी शहरात एका नव्या व आदर्श पर्वाची सुरुवात केली आहे.
वैचारिक मतभेद असले तरी मनभेद नाहीत
आज भारतरत्न डॉ. बाबासाहेब आंबेडकर यांच्या जयंतीनिमित्त सर्वत्र उत्साहाचे वातावरण असताना, नगराध्यक्ष समशेरसिंह नाईक निंबाळकर यांनी थेट विरोधी गटातील ज्येष्ठ नगरसेवक विकास काकडे (सर) यांच्या निवासस्थानी सदिच्छा भेट दिली. यावेळी त्यांनी काकडे यांच्या निवासस्थानी असलेल्या डॉ. बाबासाहेब आंबेडकर यांच्या प्रतिमेस पुष्पहार अर्पण करून अत्यंत विनम्रपणे अभिवादन केले.
समशेरसिंह नाईक निंबाळकर हे भारतीय जनता पार्टीचे नेतृत्व करतात, तर विकास काकडे हे शिवसेनेचे ज्येष्ठ नगरसेवक असून ते विरोधी गटात आहेत. राजकीय मंचावर हे दोन्ही नेते वेगवेगळ्या विचारधारेचे प्रतिनिधित्व करत असले तरी, डॉ. बाबासाहेब आंबेडकर यांच्या जयंतीसारख्या पवित्र आणि सामाजिक ऐक्याच्या दिवशी समशेरसिंहांनी सर्व राजकीय सीमा सहजपणे ओलांडल्या. विरोधी पक्षातील नेत्याच्या घरी जाऊन महामानवाला अभिवादन करण्याच्या त्यांच्या या कृतीचे संपूर्ण फलटण शहरात आणि राजकीय वर्तुळात भरभरून कौतुक होत आहे.
फलटणकरांसाठी राजकीय सलोख्याचा नवा अध्याय
सध्याच्या काळात राजकीय विरोधकांकडे वैयक्तिक पातळीवर पाहण्याची प्रवृत्ती वाढत असताना, समशेरसिंह यांनी या कृतीतून अत्यंत मोठ्या मनाचा आणि प्रगल्भतेचा संदेश दिला आहे. “राजकारण हे राजकारणाच्या ठिकाणी असते, पण त्यापलीकडे जाऊन आपण सर्वजण प्रथम ‘फलटणकर’ आहोत आणि आपले सामाजिक सलोख्याचे व माणुसकीचे नाते अधिक घट्ट आहे,” हाच संदेश त्यांनी यातून दिला आहे.
डॉ. बाबासाहेबांनी दिलेल्या समतेच्या आणि बंधुत्वाच्या विचारांचे हे खऱ्या अर्थाने कृतीत उतरवलेले रूप असून, फलटणच्या राजकीय इतिहासात हा एक नवा, सकारात्मक आणि सर्वांसाठी दिशादर्शक असा अध्याय मानला जात आहे.
