बँकांच्या गोंधळामुळे ५.५ लाख शेतकऱ्यांची कर्जमाफी रखडली; अवाच्या सवा व्याजाच्या आकारणीने मोठा वाद
थेट WhatsApp वर मिळवा
शेतकरी कर्जमाफी योजनेअंतर्गत व्यापारी बँकांनी अवाजवी व्याज आकारणी आणि नोंदींमध्ये गंभीर त्रुटी दाखवल्याने राज्य शासनाने ५.५ लाख कर्जखात्यांच्या विशेष ऑडिटचे आदेश दिले आहेत.
स्थैर्य, सातारा, दि. २२ सप्टेंबर : राज्य शासनाच्या शेतकरी कर्जमाफी योजनेच्या अंमलबजावणीदरम्यान व्यापारी बँकांचा मोठा गोंधळ आणि हेराफेरीचा प्रकार समोर आला आहे. व्यावसायिक बँकांनी कर्जदार शेतकऱ्यांच्या खात्यांवर नियमांचे उल्लंघन करून जादा व्याज आकारल्याचा संशय व्यक्त करण्यात आला आहे. याशिवाय, कर्जदारांची नावे, बँक खात्यांचे क्रमांक आणि प्रत्यक्ष कर्जरक्कमेच्या नोंदींमध्ये मोठ्या प्रमाणावर तफावत आढळल्याने शासनाने तब्बल ५.५ लाख शेतकरी कर्जखात्यांच्या विशेष ऑडिटचा निर्णय घेतला आहे. यामुळे कर्जमाफीच्या पुढील टप्प्यातील लाभ वितरणाला तात्पुरती स्थगिती मिळाली आहे.
जादा व्याज आकारणी आणि याद्या परत
कर्जमाफीसाठी बँकांकडून सादर करण्यात आलेल्या आकडेवारीची शासनाच्या अधिकृत नोंदींशी पडताळणी करण्यात आली असता, थकीत कर्ज आणि व्याजाच्या रकमेत मोठा फरक उघडकीस आला. शासनावर चुकीच्या किंवा अवाजवी व्याजाचा आर्थिक भार पडू नये, यासाठी सहकार विभागाने संबंधित त्रुटियुक्त याद्या व्यापारी बँकांकडे दुरुस्तीसाठी परत पाठवल्या आहेत. सहकार आयुक्त कार्यालयाकडून मिळालेल्या माहितीनुसार, सुमारे ४ ते ५ प्रमुख व्यापारी बँकांच्या डेटा पद्धतीत गंभीर तांत्रिक व लेखा त्रुटी आढळल्या आहेत.
विशेष ऑडिटनंतरच पुढील निर्णय
राज्यात सुमारे ५६ लाख शेतकऱ्यांना कर्जमाफीचा लाभ देण्याचे नियोजन आहे. मात्र, बँकांच्या चुकीच्या माहितीमुळे पात्र लाभार्थ्यांची अंतिम यादी धोक्यात आली आहे. आता प्रत्येक संशयित खात्याचे सखोल विशेष ऑडिट पूर्ण केले जाईल. या तपासणीत अवाजवी व्याज आकारणी सिद्ध झाल्यास संबंधित बँकांवर कारवाई केली जाण्याची शक्यता असून, त्यानंतरच निर्दोष खात्यांवर कर्जमाफीची रक्कम वर्ग केली जाणार आहे.
