बांधकाम विभागाची प्रलंबित कामे तातडीने पूर्ण करा; मंत्री शिवेंद्रसिंहराजे भोसले यांचे पावसाळी अधिवेशनापूर्वी सक्त निर्देश

स्थैर्य, सातारा, दि. २१ जून : राज्याच्या सार्वजनिक बांधकाम विभागाकडे विविध कारणांनी प्रलंबित असलेली सर्व कामे तातडीने व नियमानुसार पूर्ण करा. तसेच, ‘विकसित महाराष्ट्र २०४७’ च्या दीर्घकालीन उद्दिष्टांनुसार बांधकाम विभागाचा पुढील २० वर्षांचा विकास आराखडा तयार करा, अशा सक्त सूचना सार्वजनिक बांधकाम मंत्री श्रीमंत छ. शिवेंद्रसिंहराजे भोसले यांनी अधिकाऱ्यांना दिल्या आहेत.

येत्या पावसाळी अधिवेशनाच्या पार्श्वभूमीवर मंत्रालयात सार्वजनिक बांधकाम विभागाच्या विविध कामांचा आणि अर्थसंकल्पीय तरतुदींचा आढावा घेण्यासाठी आयोजित करण्यात आलेल्या महत्त्वपूर्ण बैठकीत ते बोलत होते.

बैठकीतील महत्त्वाचे निर्देश आणि चर्चा:

• सांख्यिकी डॅशबोर्ड (Statistics Dashboard): सार्वजनिक बांधकाम विभाग आणि MSIDC मार्फत सुरू असलेल्या राज्यभरातील रस्ते व पूल प्रकल्पांची अद्ययावत माहिती एका क्लिकवर उपलब्ध राहावी, यासाठी सांख्यिकी माहिती प्रणाली विकसित करण्याचे निर्देश त्यांनी दिले.

  

• जनसुविधा केंद्रे: राष्ट्रीय महामार्ग आणि बांधकाम विभागाच्या प्रमुख रस्त्यांलगत असलेल्या अतिरिक्त जागेचा वापर करून, सर्व सुरक्षा निकषांचे पालन करत प्रसाधनगृहे आणि जनसुविधा केंद्रे उभारण्याबाबत कार्यवाही करण्याच्या सूचना दिल्या.

• नाशिक कुंभमेळा विकासकामे: नाशिक कुंभमेळ्यासाठी पहिल्या टप्प्यातील १८ आणि दुसऱ्या टप्प्यातील १६ पॅकेजेसची कामे प्रगतीपथावर आहेत. ही कामे गुणवत्तापूर्ण, पारदर्शक आणि निर्धारित वेळेत पूर्ण करण्याचे निर्देश देण्यात आले आहेत. कामाच्या गुणवत्तेवर आयआयटी (IIT) मुंबई आणि प्राधिकरणाचे सल्लागार लक्ष ठेवून आहेत.

• प्रशासकीय कामकाज: अधिकारी व कर्मचाऱ्यांच्या पदोन्नती तसेच बदल्या वेळेत पूर्ण करणे, देयके अदा करताना अनावश्यक विलंब टाळणे आणि कालबाह्य झालेल्या सेवा प्रवेश नियमांमध्ये (Recruitment Rules) अद्ययावत सुधारणा करण्याचे आदेश दिले.

• तंत्रज्ञानाचा वापर व इतर प्रकल्प: या बैठकीत बांधकाम विभागात कृत्रिम बुद्धिमत्तेचा (AI) प्रभावी वापर, मजूर संस्थांना देण्यात येणारी कामे, रोपवे, भूसंपादन, राज्य शासनाकडे हस्तांतरित झालेली एअर इंडिया इमारत आणि अतिवृष्टीमुळे बाधित पायाभूत सुविधांची पुनर्बांधणी यांवर सविस्तर चर्चा झाली.

या बैठकीस अपर मुख्य सचिव मिलिंद म्हैसकर, सचिव (रस्ते) शरद राजभोज, मुख्य अभियंता प्रज्ञा वाळके यांच्यासह विभागाचे वरिष्ठ अधिकारी उपस्थित होते.