जिल्हा परिषद निवडणुकीच्या प्रचाराच्या तोफा आज थंडावणार; शनिवारी होणार मतदान

सातारा जिल्हा परिषद व पंचायत समिती निवडणुकीच्या जाहीर प्रचाराचा आज (गुरुवारी) शेवटचा दिवस. सायंकाळी ५ वाजता प्रचारतोफा थंडावणार. शनिवारी (दि. ०७) होणार मतदान. प्रशासन सज्ज. वाचा सविस्तर अपडेट…

स्थैर्य, फलटण, दि. ०५ फेब्रुवारी : सातारा जिल्हा परिषद व पंचायत समिती निवडणुकीच्या रणधुमाळीतील जाहीर प्रचाराची सांगता आज, गुरुवार दि. ०५ फेब्रुवारी रोजी होत आहे. गेल्या १५-२० दिवसांपासून सुरू असलेल्या आरोप-प्रत्यारोप, सभा, रॅली आणि कोपरा सभांच्या धुराळ्यानंतर आज प्रचाराच्या तोफा थंडावणार आहेत.

शनिवारी मतदानाचा हक्क बजावणार मतदार निवडणूक आयोगाच्या सुधारित वेळापत्रकानुसार, शनिवार दि. ०७ फेब्रुवारी रोजी सकाळी ७.३० ते सायंकाळी ५.३० या वेळेत मतदान प्रक्रिया पार पडणार आहे. मतदानासाठी अवघे दोन दिवस उरल्याने आजचा शेवटचा दिवस गाठण्यासाठी सर्वच राजकीय पक्षांनी आणि उमेदवारांनी आपली संपूर्ण ताकद पणाला लावली आहे. आज दिवसभर शक्तिप्रदर्शनासाठी रॅली आणि मोटारसायकल फेऱ्यांचे आयोजन करण्यात आले आहे.

प्रशासनाकडून कडेकोट तयारी मतदान प्रक्रिया निर्भय आणि पारदर्शक वातावरणात पार पाडण्यासाठी निवडणूक निर्णय अधिकारी आणि पोलीस प्रशासन सज्ज झाले आहे.

• आचारसंहिता: आचारसंहितेची कडक अंमलबजावणी सुरू होईल. बाहेरील व्यक्तींना मतदारसंघात राहण्यास मनाई करण्यात आली आहे.

  

• पोलीस बंदोबस्त: संवेदनशील मतदान केंद्रांवर जादा पोलीस कुमक तैनात करण्यात आली आहे.

  

• ड्राय डे: मतदानाच्या पार्श्वभूमीवर आज सायंकाळपासून ते मतदानाची प्रक्रिया पूर्ण होईपर्यंत मद्यविक्री बंद (Dry Day) ठेवण्याचे आदेश देण्यात आले आहेत.

९ फेब्रुवारीला निकाल शनिवारी मतदान झाल्यानंतर सोमवार, दि. ०९ फेब्रुवारी रोजी मतमोजणी होऊन निकाल जाहीर करण्यात येणार आहे. त्यामुळे आता फलटणच्या जनतेचा कौल कोणाला मिळणार, ‘राजे गट’ की ‘खासदार गट’ बाजी मारणार, याकडे सर्वांचे लक्ष लागले आहे.