यशवंतराव चव्हाण स्मारकाचा विकास होणार; नगराध्यक्षांची ग्वाही
फलटण पालिकेच्या सभेत यशवंतराव चव्हाण स्मारकाच्या दुरावस्थेचा प्रश्न मांडण्यात आला. नगराध्यक्ष समशेरसिंह नाईक निंबाळकर यांनी स्मारक विकासाची ग्वाही दिली.
स्थैर्य, फलटण, दि. ०१ जुलै : फलटण नगरपरिषदेच्या विशेष सर्वसाधारण सभेत राज्याचे पहिले मुख्यमंत्री यशवंतराव चव्हाण आणि वेणूताई चव्हाण यांच्या स्मारकाच्या विकासाचा प्रश्न मार्गी लागला आहे. नगरसेवक पंकज पवार यांनी उपस्थित केलेल्या प्रश्नावर नगराध्यक्ष समशेरसिंह नाईक निंबाळकर यांनी या स्मारकाचे सुशोभीकरण करण्याची ग्वाही सभागृहात दिली.
स्मारकासाठी कंपन्यांशी पत्रव्यवहार
स्मारकाच्या दुरावस्थेचा मुद्दा सभेत चर्चेला आल्यावर नगराध्यक्षांनी सकारात्मक भूमिका घेतली. या स्मारकाचा विकास करण्यासाठी नगरपरिषदेने दोन उद्योजक कंपन्यांशी पत्रव्यवहार केला आहे. यापैकी जी कंपनी सुशोभीकरणासाठी सर्वाधिक निधी देईल, तिला हे काम दिले जाईल, असे त्यांनी स्पष्ट केले. तसेच, स्मारक परिसरातील अनधिकृत पार्किंग रोखण्यासाठी बांधकाम विभागाला तातडीने कारवाईचे आदेश देण्यात आले आहेत.
सातत्यपूर्ण पाठपुराव्याला यश
फलटण हे वेणूताई चव्हाण यांचे माहेर असल्याने या स्मारकाविषयी नागरिकांच्या भावना जोडलेल्या आहेत. यापूर्वी सचिन सूर्यवंशी-बेडके, महेंद्र सूर्यवंशी-बेडके आणि रवींद्र बेडकीहाळ यांनी पालिकेला निवेदने देऊन स्मारकाचे नूतनीकरण करण्याविषयी पाठपुरावा केला होता. मात्र, प्रशासनाकडून याकडे दुर्लक्ष होत होते.
आता खुद्द नगराध्यक्षांनी दिलेल्या आश्वासनामुळे हा प्रश्न सुटेल, असा विश्वास पंकज पवार यांनी व्यक्त केला. जोपर्यंत काम प्रत्यक्ष सुरू होत नाही, तोपर्यंत आपला पाठपुरावा अविरतपणे सुरूच ठेवणार असल्याचेही त्यांनी स्पष्ट केले.
