यशवंतराव चव्हाण मराठी साहित्य संमेलन : शिक्षणाच्या विषयाला समर्पित एक दिवसीय महोत्सव

दैनिक स्थैर्य | दि. २१ जानेवारी २०२५ | फलटण | महाराष्ट्राचे भाग्यविधाते व देशाचे थोर नेते, रसिक, साहित्यिक व विचारवंत स्व.यशवंतराव चव्हाण यांच्या स्मृतीप्रीत्यर्थ, फलटण येथे 12 वे ‘यशवंतराव चव्हाण मराठी साहित्य संमेलन’ आयोजित करण्यात येत आहे. यंदाच्या संमेलनाच्या अध्यक्षपदी ज्येष्ठ विचारवंत तथा शिवम प्रतिष्ठानचे अध्यक्ष इंद्रजित देशमुख यांची निवड करण्यात आली आहे. हे संमेलन ‘शिक्षण’ या विषयाला समर्पित केलेले आहे, ज्यामुळे शिक्षण क्षेत्रातील विविध पैलू समोर आणण्यात मदत होणार आहे.

गुरुवार, दि. 23 जानेवारी 2025 रोजी फलटण येथील महाराजा मंगल कार्यालयात हे संमेलन संपन्न होणार आहे. राज्याचे शिक्षण संचालक शरद गोसावी यांच्या हस्ते उद्घाटन होणार असल्याचे संमेलनाचे स्वागताध्यक्ष दिलीपसिंह भोसले व कार्याध्यक्ष सचिन सूर्यवंशी (बेडके) यांनी पत्रकार परिषदेमध्ये घोषित केले.

संमेलनाच्या उद्घाटन सत्रात महाराष्ट्र राज्य साहित्य व संस्कृती मंडळाचे सदस्य विनोद कुलकर्णी, कर्नाळा (जि.सांगली) येथील ज्ञान संसाधन व संशोधन केंद्राचे संस्थापक महमदशफीक संकेश्‍वरा व चरित्र अभ्यासक आणि लेखक अमर शेंडे यांचा विशेष सत्कार होणार आहे. दुपारी 2:00 वाजता ‘मराठी भाषा, साहित्य आणि वाचन संस्कृतीमध्ये शिक्षकांचे योगदान’ या विषयावर परिसंवाद आयोजित केला आहे, ज्याच्या अध्यक्षतेखाली प्रसिद्ध वक्ते प्राचार्य रविंद्र येवले असतील. यामध्ये राष्ट्रपती पुरस्कार विजेते शिक्षक सागर बगाडे (कोल्हापूर), पुणे जिल्हा मराठी अध्यापक संघाचे अध्यक्ष नाना उर्फ जगन्नाथ शिवले, ग्रामीण कथाकार व समाजप्रबोधक प्रा. रविंद्र कोकरे सहभागी होणार आहेत.

संमेलनाच्या निमित्ताने म.सा.प. फलटण शाखेच्यावतीने स्व.सुभाषराव सूर्यवंशी (बेडके) यांच्या स्मृतीप्रीत्यर्थ यशवंतराव चव्हाण साहित्यिक गौरव पुरस्कार सुप्रसिद्ध वक्ते प्रा.मिलिंद जोशी व ज्येष्ठ साहित्यिक ‘सर्ज्या’कार सुरेश शिंदे यांना देण्यात येणार आहे. महाराजा मल्टिस्टेट को-ऑप. क्रेडिट सोसायटी लि; पुरस्कृत यशवंतराव चव्हाण सहकार गौरव पुरस्कार बुलढाणा अर्बन बँकेचे मुख्य कार्यकारी अधिकारी तथा सहसंस्थापक शिरीष देशपांडे यांना प्रदान करण्यात येणार आहे.

संमेलनाचा समारोप सातारा जिल्हा परिषदेच्या मुख्य कार्यकारी अधिकारी याशनी नागराजन यांच्या हस्ते होणार आहे. यावेळी त्यांच्या हस्ते म.सा.प.फलटण शाखा आयोजित प्राचार्य शिवाजीराव भोसले वक्तृत्त्व स्पर्धेचा पारितोषिक वितरण समारंभ संपन्न होणार असल्याचे घोषित करण्यात आले आहे.