कोयनेतील ‘महाजनको’चा पाणी कोटा संपुष्टात; राज्यावर वीजटंचाईचे आणि सिंचनाचे मोठे संकट

कोयना धरणातील पाणीसाठा कमालीचा खालावला असून तो अवघ्या १२.०४ टीएमसीवर आला आहे. ‘महाजनको’चा वीजनिर्मितीचा कोटा केवळ दोन दिवस पुरेल इतकाच (०.५८ टीएमसी) उरल्याने, १ जूनपासून वीजनिर्मिती बंद करावी लागण्याची दाट शक्यता आहे. तसेच, सिंचनाचे पाणीही थांबवावे लागणार असल्याने सातारा आणि सांगली जिल्ह्यांवर पाणीटंचाईचे मोठे संकट कोसळणार आहे.

स्थैर्य, सातारा, दि. २८ : वळिवाच्या पावसाने हुलकावणी दिल्यामुळे कोयना धरणातील पाणीपातळी झपाट्याने कमी झाली आहे. सध्या धरणात केवळ १२.०४ टीएमसी पाणीसाठा शिल्लक राहिल्याने वीजनिर्मिती आणि सिंचनाचा गंभीर प्रश्न निर्माण झाला आहे.

वीजनिर्मितीवर परिणाम:

• पश्चिमेकडील वीजनिर्मिती करणाऱ्या ‘महाजनको’चा पाण्याचा कोटा केवळ ०.५८ टीएमसी शिल्लक आहे. हा साठा जेमतेम दोन दिवस पुरेल इतकाच आहे.

  

• त्यामुळे १ जूननंतर कोयनेतून होणारी वीजनिर्मिती टप्प्याटप्प्याने बंद करावी लागण्याची भीती आहे. याचा थेट परिणाम राज्याच्या वीजपुरवठ्यावर होणार असून, राज्याला वीज बचतीचे मोठे आव्हान स्वीकारावे लागेल.

• ‘महाजनको’ने शासनाकडे सचिव स्तरावर पाण्याची मागणी केली आहे; मात्र पुरेसा पाणीसाठा नसल्याने कोयनेतून यापुढे केवळ पिण्यासाठीच पाणी सोडले जाईल, अशी माहिती सातारा सिंचन मंडळाचे अधीक्षक अभियंता अभय काटकर यांनी दिली.

सिंचन आणि पाणीटंचाईचे संकट:

• पूर्वेकडील सिंचनासाठी सध्या केवळ २.५० टीएमसी पाणी शिल्लक आहे.

• कोयनेतून सलग ६५ दिवस सुरू असलेले नदीविमोचक २४ मे रोजी बंद करण्यात आले आहे. यातून आतापर्यंत ६.९१ टीएमसी पाणी नदीपात्रात सोडण्यात आले.

• सध्या पायथा विद्युतगृहातून २१०० क्युसेक पाण्याचा विसर्ग सुरू असून, आतापर्यंत ३२.३७ टीएमसी पाणी विद्युतगृहातून सोडले गेले आहे. मात्र पूर्वेकडील सिंचनाचा कोटा संपत आल्याने हे २ हजार १०० क्युसेक पाणी ३१ मे नंतर बंद करण्यात येणार आहे.

• पाणी सोडणे बंद झाल्यानंतर सातारा आणि सांगली जिल्ह्यांतील शेती व पिण्याच्या पाण्याचा प्रश्न गंभीर होणार असून, नागरिकांना पाणीटंचाईच्या तीव्र झळा सोसाव्या लागणार आहेत. त्यामुळे सर्वांनी पाण्याचा अत्यंत काटकसरीने वापर करणे गरजेचे बनले आहे.