ज्येष्ठ पत्रकार योगेश गंगतिरे यांचा ‘सृजनशील पत्रकार पुरस्कार-२०२६’ ने मुंबईत गौरव
सामाजिक बांधिलकी जपणार्या पत्रकारितेचा सन्मान; असोसिएशन ऑफ इंडियन जर्नालिस्टच्या राष्ट्रीय अधिवेशनात मानाचा पुरस्कार
दैनिक स्थैर्य | दि. १ ऑगस्ट २०२६ | मुंबई/फलटण |
फलटणच्या पत्रकारितेला अभिमान वाटावा अशी आणखी एक उल्लेखनीय कामगिरी जेष्ठ पत्रकार तथा कसबा न्यूजचे मुख्य संपादक योगेश गंगतिरे यांनी आपल्या नावावर नोंदवली आहे. उत्कृष्ट, सामाजिक भान जपणारी आणि जनहिताची पत्रकारिता केल्याबद्दल त्यांना असोसिएशन ऑफ इंडियन जर्नालिस्ट या राष्ट्रीय पत्रकार संघटनेच्या वतीने प्रदान करण्यात येणारा ‘सृजनशील पत्रकार पुरस्कार २०२६’ प्रदान करून मुंबईतील अंधेरी येथे आयोजित भव्य समारंभात गौरविण्यात आले.
फोटोग्राफीच्या माध्यमातून पत्रकारितेत प्रवेश केलेल्या योगेश गंगतिरे यांनी आपल्या कॅमेर्यातून समाजातील वास्तव टीपत अनेक प्रश्न प्रकाशझोतात आणले. त्यानंतर संपादक म्हणून त्यांनी कसबा न्यूजच्या माध्यमातून फलटण तालुक्यातील विविध सामाजिक, प्रशासकीय, शैक्षणिक, कृषी, आरोग्य, पर्यावरण आणि सर्वसामान्य नागरिकांच्या प्रश्नांना सातत्याने वाचा फोडली. निष्पक्ष, धाडसी आणि समाजाभिमुख पत्रकारितेमुळे त्यांनी वाचकांच्या मनात विश्वासार्ह स्थान निर्माण केले आहे.
पत्रकारिता ही केवळ बातम्या देण्याचे माध्यम नसून समाजपरिवर्तनाचे प्रभावी साधन आहे, या विचारावर विश्वास ठेवत गंगतिरे यांनी अनेक जनहिताच्या प्रश्नांचा सातत्याने पाठपुरावा केला. त्यांच्या वृत्तांकनामुळे अनेक प्रश्न प्रशासनाच्या निदर्शनास आले आणि त्यावर कार्यवाहीही झाली. त्यामुळे फलटण परिसरात त्यांची ओळख सामाजिक बांधिलकी जपणारे आणि लोकहितासाठी लढणारे पत्रकार म्हणून निर्माण झाली आहे.
पुरस्कार वितरण सोहळ्यास अखगचे राष्ट्रीय अध्यक्ष विक्रम सेन यांच्या अध्यक्षतेखाली उत्साहपूर्ण वातावरणात पार पडला. यावेळी राष्ट्रीय कार्याध्यक्ष एस. एस. शेख, महाराष्ट्र प्रदेशाध्यक्ष सिकंदर नदाफ, सीडब्ल्यूसीचे प्राचार्य अजय कौल, राष्ट्रीय कार्यवाह अध्यक्ष किरण गोगोई, राष्ट्रीय सरचिटणीस मनोहर मंतोईल, राष्ट्रीय संरक्षक क्रांती चतुर्वेदी, राष्ट्रीय संस्थापक संरक्षक जीतू सोलंकी, वुमेन विंगच्या चेअरमन दीपिका द्विवेदी, लीगल विंगचे चेअरमन अरिहंत, राष्ट्रीय उपाध्यक्ष रवींद्र नेरकर, पवन पाठक, प्रदेश सरचिटणीस रमेश गणगे, लीगल विंगचे महाराष्ट्र अध्यक्ष कैलास पठारे, राष्ट्रीय प्रसारमाध्यम प्रमुख शाहनवाज शेख, हेल्थ अँड एज्युकेशन विंगचे राष्ट्रीय चेअरमन निर्मल सोलंकी, प्रदेश उपाध्यक्ष गोपाल मारवाडी, राष्ट्रीय संयोजक कौशिक दगडी, ध्रुव सिंह यांच्यासह देशभरातील अनेक वरिष्ठ पदाधिकारी, पत्रकार आणि मान्यवर उपस्थित होते.
यावेळी उपस्थित मान्यवरांनी योगेश गंगतिरे यांच्या कार्याचा गौरव करताना, स्थानिक प्रश्नांवर सातत्याने आवाज उठविणार्या आणि पत्रकारितेतील नैतिक मूल्ये जपणार्या पत्रकारांची समाजाला आज अधिक गरज असल्याचे मत व्यक्त केले. गंगतिरे यांनी आपल्या लेखणीतून आणि छायाचित्रणातून समाजातील वंचित, सर्वसामान्य आणि दुर्लक्षित घटकांच्या प्रश्नांना न्याय मिळवून देण्यासाठी सातत्याने प्रयत्न केल्याचेही मान्यवरांनी नमूद केले.
योगेश गंगतिरे यांच्या कार्यामुळे अनेक युवक पत्रकारितेकडे प्रेरणेने पाहू लागले असून, समाजकार्यात सहभागी होण्याची ऊर्जा त्यांना मिळत आहे. त्यांच्या लेखणीत सामाजिक संवेदनशीलता, अन्यायाविरुद्ध लढण्याची भूमिका, सत्यासाठीची बांधिलकी आणि पत्रकारितेतील मूल्यांप्रती असलेली निष्ठा स्पष्टपणे जाणवते.
‘सृजनशील पत्रकार पुरस्कार-२०२६’ हा त्यांच्या आजवरच्या समर्पित पत्रकारितेचा सन्मान असून, भविष्यातही त्यांनी अधिक जोमाने, निष्ठेने आणि समाजहिताची भूमिका कायम ठेवत पत्रकारितेच्या माध्यमातून लोकसेवेचे कार्य अधिक प्रभावीपणे सुरू ठेवावे, अशा शुभेच्छा यावेळी उपस्थित मान्यवरांनी व्यक्त केल्या.
