महत्त्वाची माहिती: वीर धरणातून नीरा नदीत पाण्याचा विसर्ग, सतर्कतेचा इशारा

वीर धरणात पाणीसाठा वाढल्याने 6037 क्युसेक्स पाण्याचा विसर्ग नीरा नदीत केला जाणार आहे. प्रशासनाने नदीकाठच्या गावांना व नागरिकांना सुरक्षिततेच्या कारणास्तव सतर्कतेचा इशारा दिला आहे.

स्थैर्य, फलटण, दि. ८ जुलै : वीर धरणाच्या पाणी पातळीत झपाट्याने वाढ होत असल्याने 8 जुलै रोजी सायंकाळी 6 वाजता धरणातून एकूण 6037 क्युसेक्स पाण्याचा विसर्ग नीरा नदीपात्रात करण्यात येणार आहे. यामुळे नदीकाठच्या गावांना आणि सखल भागातील नागरिकांना प्रशासनाकडून सतर्कतेचा इशारा देण्यात आला आहे.

विसर्गाचे सविस्तर नियोजन

नीरा उजवा कालवा विभागाच्या माहितीनुसार, धरणाच्या सांडव्यावरून 4637 क्युसेक्स आणि एस्केपमधून 1400 क्युसेक्स असा एकूण 6037 क्युसेक्स पाण्याचा विसर्ग नीरा नदीत सुरू करण्यात येणार आहे. धरण क्षेत्रात होणारा पाऊस आणि पाण्याची आवक यानुसार या विसर्गामध्ये गरजेनुसार कमी किंवा अधिक बदल होण्याची शक्यता वर्तवण्यात आली आहे.

प्रशासनाचे नागरिकांना आवाहन

नदीपात्रात पाण्याचा प्रवाह वाढणार असल्याने नागरिकांनी कोणत्याही कारणासाठी नदीपात्रात उतरू नये, असे स्पष्ट निर्देश देण्यात आले आहेत. तसेच नदीपात्रात काही साहित्य अथवा जनावरे असल्यास ती तत्काळ सुरक्षित ठिकाणी हलवावीत. सखल भागातील नागरिकांनी विशेष खबरदारी व दक्षता घ्यावी, असे आवाहन फलटण येथील नीरा उजवा कालवा विभागाच्या कार्यकारी अभियंत्यांनी केले आहे.