अमेरिका-इराण यांच्यात अखेर शांतता करार; युद्ध संपल्याने आंतरराष्ट्रीय बाजारात मोठे बदल
थेट WhatsApp वर मिळवा
डोनाल्ड ट्रम्प आणि मसूद पेझेश्कियान यांच्या स्वाक्षरीने चार महिन्यांचा संघर्ष संपुष्टात आला असून याचा थेट फायदा सर्वसामान्य नागरिकांना होणार आहे.
स्थैर्य, नवी दिल्ली, दि. १८ जून : अमेरिकेचे राष्ट्राध्यक्ष डोनाल्ड ट्रम्प आणि इराणचे राष्ट्राध्यक्ष मसूद पेझेश्कियान यांनी दोन्ही देशांमधील गेल्या चार महिन्यांपासून सुरू असलेले युद्ध संपवण्यासाठी एका ऐतिहासिक सामंजस्य करारावर अधिकृतपणे स्वाक्षरी केली आहे. फ्रान्समधील एका राजवाड्यात या करारावर स्वाक्षऱ्या झाल्याची माहिती समोर आली असून हा करार तात्काळ अंमलात आला आहे. या शांतता करारामुळे जागतिक पातळीवरील मोठा तणाव निवळला असून याचे थेट सकारात्मक परिणाम आता सर्वसामान्य नागरिकांच्या खिशावर होणार आहेत.
सर्वसामान्य नागरिकांना होणार ‘हा’ मोठा फायदा
अमेरिका आणि इराणमधील युद्ध अधिकृतपणे संपल्यामुळे आंतरराष्ट्रीय बाजारपेठेत स्थिरतेचे वातावरण निर्माण झाले आहे. इराणवरील खनिज तेल विक्रीचे आणि वाहतुकीचे निर्बंध शिथिल होणार असल्याने जागतिक बाजारात कच्च्या तेलाचा (क्रूड ऑईल) पुरवठा मोठ्या प्रमाणावर वाढणार आहे. परिणामी, आंतरराष्ट्रीय स्तरावर कच्च्या तेलाच्या किमती घसरण्यास मदत होईल, ज्यामुळे भारतातील पेट्रोल आणि डिझेलचे दर कमी होण्याची दाट शक्यता निर्माण झाली आहे. इंधनाचे दर आटोक्यात आल्यास वाहतूक खर्च कमी होईल आणि पर्यायाने सर्वसामान्य नागरिकांना भेडसावणाऱ्या महागाईपासून मोठा दिलासा मिळेल.
६० दिवसांचा वाटाघाटीचा कालावधी सुरू
या करारानुसार दोन्ही देशांमध्ये पुढील ६० दिवसांसाठी वाटाघाटीचा कालावधी सुरू झाला आहे. या काळात परस्पर विश्वासावर नकारात्मक परिणाम करू शकणारी कोणतीही राजकीय, आर्थिक किंवा लष्करी कारवाई दोन्ही बाजूंना टाळावी लागणार आहे. इराणच्या परराष्ट्र मंत्रालयाचे प्रवक्ते इस्माइल बघाई यांनी स्पष्ट केले की, इराणला कोणत्याही निर्बंधांशिवाय तेल विकण्याची परवानगी मिळाली पाहिजे. या आराखड्याचे पूर्ण आणि कायमस्वरूपी शांतता करारात रूपांतर करण्यासाठी दोन्ही देशांचे वाटाघाटी करणारे नेते लवकरच स्वित्झर्लंडमधील जिनिव्हा येथे एकत्र येणार आहेत.
