सातारा-सांगली: विधान परिषदेसाठी मतदान – उमेदवारांचा फैसला
सातारा-सांगली विधान परिषद निवडणुकीसाठी फलटणमध्ये मतदान प्रक्रिया सुरू आहे. महायुतीच्या भक्कम पाठिंब्यामुळे भाजप उमेदवाराचा विजयाचा मार्ग सुकर झाला आहे.
स्थैर्य, सातारा, दि. १८ जून : सातारा-सांगली स्थानिक स्वराज्य संस्था विधान परिषद मतदारसंघासाठी फलटण येथील तहसीलदार कार्यालयात मतदान प्रक्रिया पार पडत आहे. या निवडणुकीत महायुतीचे उमेदवार धैर्यशील कदम आणि महाविकास आघाडीचे उमेदवार अभयसिंह जगताप यांच्यात थेट लढत होत असून मतदार कोणाला कौल देणार, याकडे सर्वांचे लक्ष लागले आहे.
मतदारांची अज्ञात स्थळावरून हजेरी
भारतीय जनता पक्षाने आपले नगरसेवक, जिल्हा परिषद सदस्य आणि पंचायत समितीचे सभापती या मतदारांना अज्ञात स्थळी ठेवले होते. हे सर्व मतदार थेट मतदान केंद्रावर मतदानासाठी दाखल होणार आहेत. ही निवडणूक प्रक्रिया बॅलेट पेपरवर राबवली जात आहे.
महायुतीमध्ये समन्वय
महायुतीमधील अंतर्गत धुसपूस शांत झाली आहे. उपमुख्यमंत्री एकनाथ शिंदे यांच्या आदेशानुसार शिवसेना महायुतीसोबत राहणार असल्याचे पर्यटन मंत्री शंभूराज देसाई यांनी स्पष्ट केले. तसेच, उपमुख्यमंत्री सुनेत्रा पवार यांच्या सूचनेनुसार राष्ट्रवादी काँग्रेस पक्षही महायुतीसोबत असल्याची माहिती मदत व पुनर्वसन मंत्री मकरंद पाटील यांनी दिली.
भाजपचा मार्ग सुकर
शिवसेना आणि राष्ट्रवादी काँग्रेस पक्षाने भक्कम पाठिंबा दर्शवल्यामुळे भारतीय जनता पक्षाचे उमेदवार धैर्यशील कदम यांच्या निवडीचा मार्ग सुकर झाला आहे. या एकत्रित ताकदीमुळे महायुतीचे पारडे जड मानले जात आहे.
