स्थैर्य, वाई, दि.२४: वाई शहरात पाच ठिकाणी घरफोडी करून 52 हजार रुपये लंपास करणार्‍या तिघांना वाई गुन्हे प्रकटीकरण विभागाने अटक केली असून, सनी सुरेश जाधव (वय 26), अक्षय गोरख माळी (वय 20), सागर सुरेश जाधव (वय 24, सर्व रा. गुरेबाजार झोपडपट्टी, सिद्धनाथवाडी, ता. वाई) अशी अटक केलेल्या आरोपींची नावे आहेत. संबंधित आरोपींकडून चोरीस गेलेल्या मुद्देमालापैकी 17 हजार रुपये हस्तगत करण्यात आले आहेत.
याबाबत वाई पोलिसांनी दिलेली अधिक माहिती अशी की, दि. 22 फेब्रुवारी 2021 रोजी रात्री 8.30 ते दि. 23 फेब्रुवारी 2021 रोजी 9 वाजण्याच्या दरम्यान वाई शहरातील शशिकांत चंद्रकांत येवले (वय 28, रा. भोगाव, ता. वाई) यांच्या मालकीच्या आम्रपाली बिअर बार, 598, गणपतीआळी, वाई येथे असलेला बिअर बारचे बंद शटर उचकटून त्यांच्या कॅश काउंटरमधील 14 हजार 200 रुपये रोख रक्कम चोरी गेली आहे. सुशांत संतोष गोळे (वय 27, रा. बोरगाव, ता. वाई) यांच्या मालकीचे साईकृपा कृषी केंद्र, गणपतीआळी वाई नावाचे खताचे दुकानाचे बंद शटर उचकटून त्यांच्या कॅश काउंटरमधील 18 हजार रुपये रोख रक्कम चोरीस गेली आहे. बिलाल इकबाल बागवान (वय 30, रा. गणपतीआळी, वाई) यांच्याकडील 11 हजार रुपये रोख रक्कम चोरीस गेली आहे तर रविचंद्र प्रदीप भाटे (वय 42, रा. मधलीआळी, वाई) यांच्या मालकीचे भाटे दूध डेअरीचे बंद शटर उचकटून त्यांच्या कॅश काउंटरमधील 300 रुपये रोख रक्कम व 3 आइसस्क्रीमचे बॉक्स असा 1800 रु. किमतीचा माल चोरीस गेला आहे. नितीन रवींद्र शिंगटे (वय 45, रा. विराटनगर, वाई) यांच्या मालकीचे अष्टविनायक फार्मा नावाच्या दुकानाचे बंद शटर उचकटून त्यांच्या कॅश काउंटरमधील 7 हजार रोख रक्कम चोरीस गेली आहे. या घरफोडी, चोरीबाबत वाई पोलीस स्टेशनला गुन्हे दाखल करण्यात आले होते.
या घरफोडी-चोर्‍यांची माहिती वाईचे पोलीस निरीक्षक आनंदराव खोबरे यांना मिळताच त्यांनी वाई पोलीस ठाणे गुन्हे प्रकटीकरण विभागाच्या कर्मचार्‍यांना तत्काळ आरोपींचा शोध घेऊन त्यांना अटक करण्याबाबतच्या सूचना दिल्या. गुन्हे प्रकटीकरण विभागाचे कर्मचारी संशयित आरोपींचा शोध घेत असतानाच पोलीस निरीक्षक आनंदराव खोबरे यांना त्यांच्या खास बातमीदारामार्फत माहिती मिळाली की, सदरच्या सर्व चोर्‍या गुरेबाजार झोपडपट्टी वाई येथील तीन मुलांनी केलेल्या आहेत.त्यानंतर पोलीस निरीक्षक यांनी सदरची माहिती गुन्हे प्रकटीकरण विभागाच्या कर्मचार्‍यांना देऊन आरोपींना तत्काळ पकडण्याबाबत सूचना दिल्या. त्यानुसार गुन्हे प्रकटीकरण विभागाच्या कर्मचार्‍यांनी सदर आरोपींची माहिती प्राप्त करून त्यांना वाई शहरात फिरत असताना ताब्यात घेतले. सदर आरोपींनी वरील पाचही चोर्‍याा केल्याचे कबूल केले असून, त्यांच्याकडून आत्तापर्यंत चोरलेल्या रोख रक्कमेपैकी 17 हजार रुपये हस्तगत करण्यात आले आहेत. उर्वरीत रक्कम हस्तगत करण्याच्यादृष्टीने तपास चालू आहे.
या कारवाईत जिल्हा पोलीस अधीक्षक अजयकुमार बन्सल, अप्पर पोलीस अधीक्षक धीरज पाटील, उपविभागीय पोलीस अधिकारी शीतल जानवे- खराडे यांच्या मार्गदर्शनाखाली वाई पोलीस निरीक्षक आनंदराव खोबरे यांचे मार्गदर्शन व सूचनेप्रमाणे सहायक पोलीस उपनिरीक्षक विजय शिर्के, कृष्णराज पवार, पो. कॉ. सोमनाथ बल्लाळ, किरण निंबाळकर, श्रावण राठोड, अक्षय नेवसे यांनी सहभाग घेतला होता.
