फलटण: लखन मोरे भारतीय सॉफ्ट हॉकी संघाचे कर्णधार – मानाचा तुरा
नेपाळमध्ये होणाऱ्या आशियाई चॅम्पियनशिपसाठी भारतीय सॉफ्ट हॉकी संघाच्या कर्णधारपदी फलटणच्या लखन मोरे यांची निवड झाली आहे. या निवडीमुळे शहरात उत्साहाचे वातावरण आहे.
स्थैर्य, फलटण, दि. 22 मे : अमेचर सॉफ्ट हॉकी फेडरेशन ऑफ इंडियातर्फे आयोजित फर्स्ट सॉफ्ट एशियन चॅम्पियनशिपसाठी भारतीय पुरुष संघाच्या कर्णधारपदी फलटणचे लखन मोरे यांची निवड झाली आहे. नेपाळमधील काठमांडू येथे ही आंतरराष्ट्रीय स्पर्धा पार पडणार आहे.
जयपूर येथील शिबिरात निवड
राजस्थानमधील जयपूर येथे १४ ते १८ मे दरम्यान पाच दिवसीय विशेष प्रशिक्षण शिबिर आयोजित करण्यात आले होते. या शिबिरात ऑल इंडिया सॉफ्ट हॉकी फेडरेशनचे वरिष्ठ अधिकारी आणि प्रशिक्षकांच्या उपस्थितीत भारतीय पुरुष व महिला संघाच्या कर्णधारांची निवड जाहीर करण्यात आली. यात लखन मोरे यांच्या नावाची घोषणा करण्यात आली.
चार देशांचा सहभाग
काठमांडू येथे होणाऱ्या या आंतरराष्ट्रीय स्पर्धेत भारतासह नेपाळ, पाकिस्तान आणि भूतान हे देश सहभागी होणार आहेत. सामाजिक कार्यकर्ते नंदकुमार मोरे यांचे सुपुत्र असलेल्या लखन यांची आंतरराष्ट्रीय पातळीवर नेतृत्व करण्यासाठी निवड झाल्याने फलटण तालुक्यात जल्लोष करण्यात आला.
फलटणमध्येच मिळाले खेळाचे बाळकडू
लखन मोरे यांचे माध्यमिक शिक्षण फलटण येथील यशवंतराव चव्हाण हायस्कूलमध्ये झाले. त्यानंतरचे उच्च शिक्षण त्यांनी मुधोजी कॉलेजमध्ये पूर्ण केले. शालेय आणि महाविद्यालयीन शिक्षणासोबतच हॉकीचे संस्कार आणि खेळाचे बाळकडू त्यांना याच संस्थांमधून मिळाले.
