सातारा जिल्हाधिकारी जितेंद्र डूडी पुणेला गेले, संतोष पाटील नवे जिल्हाधिकारी

दैनिक स्थैर्य | दि. ०२ जानेवारी २०२५ | फलटण | सातारा जिल्ह्याचे जिल्हाधिकारी जितेंद्र डूडी यांची पुणे जिल्हाधिकारी म्हणून बदली झाल्याने जिल्ह्यात एक नवीन अधिकारी वर्णी लागला आहे. या बदलीमुळे सातारा जिल्हाधिकारी पदाची जबाबदारी आता संतोष पाटील यांच्याकडे सोपवण्यात आली आहे.

जितेंद्र डूडी यांनी सातारा जिल्ह्याचे जिल्हाधिकारी म्हणून गेल्या दीड वर्षात अनेक लोकाभिमुख निर्णय घेत जिल्ह्याच्या विकासाला चालना दिली होती. त्यांनी महाबळेश्वरमधील अतिक्रमणांविरोधात खमकी भूमिका घेतली होती आणि कास येथील अतिक्रमणांवरही हातोडा उगारला होता. त्यांच्या कार्यकाळात जिल्ह्याच्या विकासात महत्त्वपूर्ण योगदान दिल्याने त्यांची कार्यशैली विशेषतः प्रशंसनीय होती.

साताराजिल्ह्याचे तत्कालीन जिल्हाधिकारी रुचेश जयवंशी यांची तडकाफडकी बदली झाल्यानंतर 7 जून 2023 रोजी सांगली जिल्हा परिषदचे मुख्य कार्यकारी अधिकारी जितेंद्र डूडी यांची सातारा जिल्हाधिकारी म्हणून नियुक्ती करण्यात आली होती. आता त्यांच्या जागेवर पुणे जिल्हा परिषदेचे मुख्य कार्यकारी अधिकारी संतोष पाटील यांची नियुक्ती करण्यात आली आहे, ज्यामुळे सातारा जिल्ह्याच्या प्रशासनात एक नवीन अध्याय सुरू होत आहे.