सातारा: कॉपर वायर चोरणारी टोळी गजाआड – २६ गुन्ह्यांचा उलगडा
बोरगाव पोलीस स्टेशन व स्थानिक गुन्हे शाखेने सातारा जिल्ह्यात कॉपर वायर आणि ट्रान्सफार्मर चोरणाऱ्या टोळीला शिताफीने अटक केली आहे. या धडक कारवाईत पोलिसांनी तब्बल २० लाखांचा मुद्देमाल जप्त करून २६ गुन्ह्यांचा यशस्वी उलगडा केला आहे.
स्थैर्य, सातारा, दि. १७ जून : सातारा जिल्ह्यात मागील काही महिन्यांपासून शेती पंपाच्या कॉपर वायर आणि ट्रान्सफार्मर चोरीच्या घटनांमध्ये वाढ झाली होती. या पार्श्वभूमीवर बोरगाव पोलीस स्टेशन व स्थानिक गुन्हे शाखेने (एलसीबी) संयुक्त कारवाई करत एका आंतरतालुका चोरी करणाऱ्या टोळीला जेरबंद केले आहे. या कारवाईत तब्बल २० लाख २२ हजार ४८२ रुपयांचा मुद्देमाल जप्त करण्यात आला असून २६ गुन्ह्यांचा उलगडा झाला आहे.
तांत्रिक तपासातून संशयितांना अटक
बोरगाव पोलीस स्टेशनच्या हद्दीत वाढत्या चोरीच्या घटनांनंतर तपासाला वेग देण्यात आला होता. गोपनीय माहिती व तांत्रिक विश्लेषणाच्या आधारे पोलिसांनी पाच संशयितांना सापळा रचून ताब्यात घेतले. यामध्ये हर्षद जाधव, स्वप्नील मगर, विकास कदम, विवेक लादे आणि शेखर सावंत यांचा समावेश आहे. या गुन्ह्यातील मुख्य संशयित सागर मोरे व इतर अनोळखी साथीदारांचा पोलीस शोध घेत आहेत.
२० लाखांचा मुद्देमाल जप्त
अटक करण्यात आलेल्या संशयितांकडे सखोल चौकशी केली असता, त्यांनी बोरगाव, कोरेगाव, सातारा तालुका, सातारा शहर, भुईंज आणि उंब्रज या पोलीस स्टेशनच्या हद्दीत एकूण २६ ठिकाणी चोऱ्या केल्याची कबुली दिली. या कारवाईत गुन्ह्यात वापरलेली पिकअप गाडी, ४ मोटरसायकली, ५ मोबाईल, चोरीचे साहित्य आणि रोख रक्कम असा एकूण २० लाख २२ हजार ४८२ रुपयांचा मुद्देमाल जप्त करण्यात आला आहे.
वरिष्ठांचे मार्गदर्शन
ही कारवाई सातारा जिल्ह्याचे पोलीस अधीक्षक निखिल पिंगळे, अपर पोलीस अधीक्षक वैशाली कडुकर आणि उपविभागीय अधिकारी राजीव नवले यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक विश्वजीत घोडके, बोरगाव पोलीस स्टेशनचे प्रभारी सहायक पोलीस निरीक्षक प्रशांत हुले आणि त्यांच्या पथकाने या गुन्ह्यांचा यशस्वी तपास केला. सध्या या प्रकरणाचा पुढील तपास पोलीस उपनिरीक्षक एस. एम. बसवंत करत आहेत.
