समर्थ रामदास स्वामींच्या बदनामीविरोधात साताऱ्यात संताप; दोषींवर तात्काळ कठोर कारवाईची मागणी
संत समर्थ रामदास स्वामी यांच्या बदनामीप्रकरणी साताऱ्यात तीव्र संताप व्यक्त होत असून, ‘श्री शिवप्रतिष्ठान हिंदुस्थान’सह विविध संघटनांनी दोषींवर तात्काळ कठोर कारवाई करण्याची मागणी सातारा पोलीस अधीक्षकांकडे केली आहे.
स्थैर्य, सातारा, दि. ७ : संत समर्थ श्री रामदास स्वामी यांच्या बदनामीप्रकरणी तीव्र संताप व्यक्त करत, ‘श्री शिवप्रतिष्ठान हिंदुस्थान’ आणि इतर संघटनांच्या वतीने सातारा पोलीस अधीक्षकांकडे दोषींवर तात्काळ व कठोर कारवाई करण्याची ठाम मागणी करण्यात आली आहे. तसेच देव, देश, धर्म, संत व राष्ट्रपुरुषांचा अपमान करणाऱ्या समाजकंटकांविरोधात कडक कायदा करण्याचीही जोरदार मागणी एका निवेदनाद्वारे करण्यात आली आहे.
निवेदनातील प्रमुख मुद्दे आणि आरोप :
-
ऐतिहासिक कार्याचा अपमान: समर्थ रामदास स्वामी यांनी समाजजागृती, धर्मप्रसार आणि राष्ट्रभक्ती रुजविण्यात ऐतिहासिक कार्य केले आहे. छत्रपती शिवाजी महाराजांच्या स्वराज्य स्थापनेलाही त्यांची प्रेरणा लाभली होती. असे असताना काही समाजविघातक घटकांकडून जाणीवपूर्वक दिशाभूल करणारी व अपमानास्पद विधाने केली जात आहेत.
-
समाजमाध्यमांचा गैरवापर: विशेषतः समाजमाध्यमांचा (Social Media) आधार घेत कोणतेही ठोस ऐतिहासिक पुरावे न देता संतांच्या चारित्र्यावर घाणेरडे आरोप केले जात आहेत. ही बाब अत्यंत गंभीर असल्याचे संघटनेने नमूद केले आहे.
-
तरुण पिढीची दिशाभूल: अशा निराधार प्रकारांमुळे तरुण पिढीची दिशाभूल होत असून, समाजात तेढ आणि असंतोष निर्माण करण्याचा जाणीवपूर्वक प्रयत्न सुरू असल्याचा आरोप निवेदनात करण्यात आला आहे.
कठोर कायदा करा, अन्यथा तीव्र आंदोलन
या पार्श्वभूमीवर संबंधितांवर तातडीने गुन्हे दाखल करून कठोर कारवाई करावी, अशी मागणी करण्यात आली आहे. तसेच, भविष्यात अशा घटनांना आळा घालण्यासाठी शासनाने कडक कायदा त्वरित करावा. संत व राष्ट्रपुरुषांचा अपमान अजिबात सहन केला जाणार नाही, असा सज्जड इशारा निवेदनातून देण्यात आला आहे. पोलीस प्रशासनाने या प्रकरणाची गांभीर्याने दखल घेऊन त्वरित ठोस पावले न उचलल्यास जनतेच्या वतीने तीव्र आंदोलन छेडले जाईल, असेही स्पष्ट करण्यात आले आहे.
मान्यवरांची उपस्थिती
निवेदन देतेवेळी श्री समर्थ सेवा मंडळ (सज्जनगड) चे योगेशबुवा रामदासी, शहाजीबुवा रामदासी, शिवराज तलवार, भक्ती डाफळे, उमेश गांधी, तसेच विश्व हिंदू परिषदेचे विजय गाढवे, महेश शिवदे, राजेंद्र जाधव, अमोल गोसावी, अक्षय पुजारी, मल्हार दिवाकर, संजय शिंदे, परेश पाटील, प्रसाद माने, प्रवीण रसाळ यांच्यासह सातारा तालुक्यातील धारकरी, समर्थभक्त, हिंदुत्वनिष्ठ आणि गोरक्षक मोठ्या संख्येने उपस्थित होते.
