भारतात लवकरच प्लास्टिक नोटा? RBI ची मोठी तयारी; २ दिग्गज कंपन्यांची शर्यतीत एन्ट्री
थेट WhatsApp वर मिळवा
रिझर्व्ह बँक ऑफ इंडिया १० आणि २० रुपयांच्या टिकाऊ प्लास्टिक नोटा आणण्याच्या तयारीत असून युफ्लेक्स आणि स्पेक्ट्रा सिस्टीम्सची संयुक्त निविदा दाखल झाली आहे.
स्थैर्य, सातारा, दि. ०५ ऑक्टोबर : भारतीय मध्यवर्ती बँक अर्थात रिझर्व्ह बँक ऑफ इंडिया (RBI) देशात १० रुपये आणि २० रुपये मूल्याच्या प्लास्टिक (पॉलिमर) नोटांच्या फिल्ड ट्रायलची तयारी वेगाने करत आहे. या योजनेसाठी आवश्यक असणाऱ्या विशेष बीओपीपी (BOPP) मटेरियलच्या पुरवठ्यासाठी तब्बल ६८ हजार रिमची मागणी नोंदवण्यात आली आहे. या महत्त्वाकांक्षी प्रकल्पाचे कंत्राट मिळवण्यासाठी भारतातील आघाडीची कंपनी युफ्लेक्स (UFlex) आणि अमेरिकेची तंत्रज्ञान क्षेत्रातील दिग्गज कंपनी स्पेक्ट्रा सिस्टीम्स (Spectra Systems) यांनी एकत्र येत संयुक्त निविदा सादर केली आहे.
टिकाऊपणा अन् सुरक्षेवर विशेष भर
भारतीय चलनातील कागदी नोटांची आयुर्मर्यादा वाढवण्यासाठी आणि बनावट नोटांच्या समस्येला आळा घालण्यासाठी भारतीय रिझर्व्ह बँक नोट मुद्रण प्रायव्हेट लिमिटेडने (BRBNMPL) बीओपीपी मटेरियल खरेदीची प्रक्रिया सुरू केली आहे. यामध्ये १० रुपये आणि २० रुपयांच्या नोटांसाठी प्रत्येकी ३४ हजार रिमचा समावेश आहे. पॉलिमर नोटा या पारंपारिक कागदी नोटांच्या तुलनेत अधिक टिकाऊ, जलरोधक आणि सुरक्षित मानल्या जातात.
चाचणी यशस्वी झाल्यास मोठा बदल
या प्रकल्पात युफ्लेक्स कंपनीच्या पॉलिमर निर्मिती क्षेत्रातील दांडग्या अनुभवाचा आणि स्पेक्ट्रा सिस्टीम्सच्या सुरक्षा व नोट पडताळणी तंत्रज्ञानाचा वापर केला जाणार आहे. भारतीय हवामानातील विविधतेत आणि रोजच्या वापरादरम्यान या नोटा किती टिकाऊ ठरतात याची चाचणी यशस्वी झाल्यास आगामी काळात देशभरात मोठ्या प्रमाणावर पॉलिमर नोटा चलनात आणण्याचा मार्ग मोकळा होणार आहे.
