बाळशास्त्री जांभेकरांवरील ग्रंथाचा मोठा सन्मान; ज्येष्ठ पत्रकार रवींद्र बेडकिहाळ यांना राज्यस्तरीय पुरस्कार जाहीर
रवींद्र बेडकिहाळ यांच्या बाळशास्त्री जांभेकरांवरील ग्रंथाला राज्यस्तरीय अक्षर गौरव साहित्य पुरस्कार जाहीर झाला आहे. रविवारी साताऱ्यात हा सोहळा पार पडेल.
स्थैर्य, फलटण, दि. १९ ऑगस्ट : फलटण येथील ज्येष्ठ पत्रकार व साहित्यिक रवींद्र बेडकिहाळ यांनी लेखन केलेल्या ‘दर्पणकार आचार्य बाळशास्त्री जांभेकर – कर्तृत्वाचा एक शोध’ या त्रिखंडात्मक चरित्र ग्रंथाला साताऱ्याचा मानाचा १४ वा राज्यस्तरीय ‘अक्षर गौरव साहित्य विशेष पुरस्कार’ जाहीर झाला आहे.
ग्रंथाचे ऐतिहासिक महत्त्व
महाराष्ट्र राज्य साहित्य आणि संस्कृती मंडळाने हा त्रिखंडात्मक चरित्र ग्रंथ प्रकाशित केला आहे. आद्य पत्रकार बाळशास्त्री जांभेकर यांच्या बहुआयामी जीवनावर प्रदीर्घ संशोधन करून बेडकिहाळ यांनी हा ग्रंथ साकारला आहे. यात ‘दर्पण’ व ‘दिग्दर्शन’च्या कार्यासोबतच जांभेकरांचे इतिहास, शिक्षण, गणित आणि वैज्ञानिक संशोधनातील योगदान विस्तृतपणे मांडण्यात आले आहे. अभ्यासकांसाठी हा ग्रंथ एक अनमोल ठेवा मानला जात आहे.
रविवारी साताऱ्यात पुरस्कार वितरण
सातारा येथील अश्वमेध ग्रंथालय व वाचनालयातर्फे रविवारी (२३ ऑगस्ट) सकाळी अकरा वाजता कॅ. भाऊसाहेब सोमण सभागृह, राजवाडा चौपाटी येथे हा पुरस्कार वितरण सोहळा पार पडणार आहे. ज्येष्ठ कवयित्री ज्योत्स्ना चांदगुडे यांच्या हस्ते आणि गझलकार धनंजय तडवळकर यांच्या प्रमुख उपस्थितीत हा कार्यक्रम होईल. या सोहळ्यास उपस्थित राहण्याचे आवाहन अश्वमेध ग्रंथालयाचे संस्थापक रवींद्र भारती आणि अध्यक्ष राजेंद्र माने यांच्यासह पदाधिकाऱ्यांनी केले आहे.
