
थेट WhatsApp वर मिळवा
प्रधानमंत्री किसान सन्मान निधी (PM-Kisan) योजनेअंतर्गत पात्र शेतकरी कुटुंबांना दरवर्षी ६,००० रुपयांची आर्थिक मदत प्रत्येकी २,००० रुपयांच्या तीन समान हप्त्यांमध्ये थेट बँक खात्यात जमा केली जाते. ज्या नवीन शेतकऱ्यांनी अद्याप या योजनेसाठी नोंदणी केलेली नाही, ते घरबसल्या ऑनलाइन किंवा नजीकच्या आपले सरकार सेवा केंद्राद्वारे (CSC) अर्ज करू शकतात.
स्थैर्य,सातारा, दि. १६ नोव्हेंबर : देशातील शेतकरी वर्गाला आर्थिक आधार देण्यासाठी केंद्र शासनाकडून पीएम किसान योजना अत्यंत प्रभावीपणे राबवली जात आहे. नवीन नोंदणी करू इच्छिणाऱ्या शेतकऱ्यांसाठी शासनाने प्रक्रिया सुटसुटीत केली असून, यासाठी काही महत्त्वाची कागदपत्रे असणे अनिवार्य आहे.
नवीन नोंदणीसाठी आवश्यक कागदपत्रे
आधार कार्ड: अर्जदाराची ओळख पटवण्यासाठी आणि ई-केवायसी (e-KYC) करण्यासाठी आधार कार्ड आवश्यक आहे.
बँक पासबुक: डीबीटी (DBT) द्वारे थेट खात्यात पैसे जमा होण्यासाठी बँक खाते आधार कार्डशी लिंक असणे आणि पासबुकची प्रत आवश्यक आहे.
जमिनीची कागदपत्रे: सातबारा (7/12) उतारा, आठअ (8-A) व जमिनीच्या मालकीची इतर कायदेशीर कागदपत्रे.
मोबाईल नंबर: आधार कार्डशी लिंक असलेला चालू मोबाईल नंबर (ज्यावर ओटीपी येईल).
ऑनलाइन अर्ज करण्याची सोपी प्रक्रिया
सर्वप्रथम पीएम किसानच्या अधिकृत pmkisan.gov.in या संकेतस्थळाला भेट द्या.
होमपेजवरील ‘Farmers Corner’ मधील ‘New Farmer Registration’ या पर्यायावर क्लिक करा.
ग्रामीण किंवा शहरी शेतकरी नोंदणी निवडून तुमचा आधार क्रमांक, मोबाईल नंबर व राज्य निवडा आणि कॅप्चा टाकून ‘Get OTP’वर क्लिक करा.
मोबाईलवर आलेला ओटीपी प्रविष्ट करून अर्जदाराची वैयक्तिक माहिती, बँक तपशील आणि जमिनीचा सर्व्हे/खाता नंबर भरा.
विचारलेली आवश्यक कागदपत्रे अपलोड करून अर्ज सबमिट करा. अर्ज यशस्वीरीत्या सादर झाल्यानंतर मिळालेला नोंदणी क्रमांक (Registration ID) भविष्यातील संदर्भासाठी जपून ठेवा.



