फलटण: कालकथित नितीन भालेराव यांना धम्ममय पुण्यानुमोदनातून आदरांजली; व्यसनमुक्तीचा निर्धार
कालकथित नितीन भालेराव यांच्या स्मृतिप्रीत्यर्थ फलटण येथे आयोजित पुण्यानुमोदन कार्यक्रमात त्यांना भावपूर्ण आदरांजली वाहण्यात आली. यावेळी उपस्थितांनी व्यसनमुक्त समाज निर्मितीचा निर्धार व्यक्त केला.
स्थैर्य, फलटण, दि. 10 मे : कालकथित नितीन बाबासो भालेराव यांच्या स्मृतिप्रीत्यर्थ आयोजित पुण्यानुमोदन कार्यक्रमात बुद्ध धम्माच्या संस्कार विधीनुसार धम्ममय वातावरणात विधी पार पडला. भारतीय बौद्ध महासभा शाखा फलटण तालुक्याचे माजी अध्यक्ष तथा बौद्धाचार्य महावीर भालेराव यांच्या हस्ते हा विधी संपन्न झाला. यावेळी उपस्थितांनी व्यसनमुक्त समाज निर्मितीचा संकल्प केला.
चांगल्या विचारांचा स्वीकार करणे गरजेचे:
यावेळी मार्गदर्शन करताना बौद्धाचार्य महावीर भालेराव यांनी नितीन भालेराव यांच्या जीवनकार्याची आठवण करून त्यांना भावपूर्ण आदरांजली वाहिली. ते म्हणाले, “जीवनात चांगल्या मित्रांची साथ मिळणे महत्त्वाचे आहे. वाईट संगती सोडून चांगल्या विचारांचा स्वीकार केला पाहिजे. नितीन यांनी समाजात सकारात्मक विचार देण्याचा प्रयत्न केला. आज ते आपल्या सोबत नसले तरी त्यांचे विचार कायम स्मरणात राहतील. आर्यन आणि गुड्डी यांना सर्वांनी सहकार्य करावे,” असे आवाहन त्यांनी केले. यानंतर अनंत राऊत यांनी ‘मित्र’ ही कविता सादर केली, ज्यामुळे वातावरण भावुक झाले.
व्यसनातून बाहेर पडण्यासाठी सामूहिक प्रयत्न आवश्यक:
संदीप भालेराव यांनी मार्गदर्शन करताना सांगितले की, “नितीन हे सर्वांशी मैत्रीपूर्ण व आदराने वागणारे व्यक्तिमत्त्व होते. मदतीस तत्पर असलेला माणूस चुकीच्या संगतीमुळे व्यसनाच्या आहारी गेला. तथागत बुद्धांनी दुःखमुक्तीचा मार्ग दिला असून व्यसनातून बाहेर पडण्यासाठी संवाद, समजूत आणि सामूहिक प्रयत्न आवश्यक आहेत.” तर किरण गायकवाड यांनी समाजाला यातून बोध घेण्याचे आवाहन करत भीमनगरातून दारूबंदीची सुरुवात व्हावी, अशी अपेक्षा व्यक्त केली.
पंचशील आणि धम्माचा मार्गच खरा आधार:
माजी प्रचार व पर्यटन उपाध्यक्ष रामचंद्र मोरे यांनी आपल्या भावना व्यक्त करत व्यसनमुक्तीसाठी प्रत्येकाने घरापासून सुरुवात करण्याचे आवाहन केले. माजी सरचिटणीस बाबासाहेब जगताप यांनी पंचशील पालनाचे महत्त्व अधोरेखित केले. “लहान मुलांवर योग्य संस्कार आणि लक्ष ठेवणे आवश्यक आहे. दुःखावर व्यसन हा उपाय नसून पंचशील आणि धम्माचा मार्गच खरा आधार आहे. समाज दुःखाच्या खाईत जात असताना सर्वांनी एकत्र येऊन व्यसनाला मूठमाती देण्याचा संकल्प केला पाहिजे,” असे ते म्हणाले.
कार्यक्रमात उपस्थितांनी कालकथित नितीन भालेराव यांना एक मिनिट उभे राहून आदरांजली अर्पण करत व्यसनमुक्त समाज निर्मितीचा निर्धार व्यक्त केला. याप्रसंगी भारतीय बौद्ध महासभा शाखा सातारा जिल्हा पूर्व व फलटण तालुका शाखेचे माजी पदाधिकारी, तसेच राजाळेतील बौद्ध उपासक-उपासिका आणि ग्रामस्थ मोठ्या संख्येने उपस्थित होते.
