अनधिकृत फटाके विक्रीवर कठोर कारवाईचा इशारा; तहसीलदारांचा मोठा निर्णय
थेट WhatsApp वर मिळवा
दिवाळीनिमित्त फलटण तालुक्यात तात्पुरत्या फटाका स्टॉलसाठी परवानगी बंधनकारक करण्यात आली आहे. विनापरवाना विक्री करणाऱ्यांवर थेट गुन्हे दाखल होणार आहेत.
स्थैर्य, फलटण, दि. २२ ऑक्टोबर : दिवाळीच्या पार्श्वभूमीवर फलटण तालुक्यात फटाका विक्रीसाठी महसूल व पोलीस प्रशासनाकडून रीतसर परवाना घेणे बंधनकारक करण्यात आले आहे. नियमांचे उल्लंघन करून अथवा विनापरवाना फटाके विक्री करणाऱ्यांवर दुकाने सील करून थेट गुन्हे नोंदवण्याचा कठोर इशारा तहसीलदार कार्यालयाने दिला आहे.
परवान्यासाठी ३१ ऑक्टोबरची मुदत
दिवाळी सण उत्साहात साजरा होत असताना सुरक्षिततेच्या दृष्टीने प्रशासनाने तात्पुरत्या फटाका स्टॉल्ससाठी नियमावली जाहीर केली आहे. पोलीस स्टेशनचे ना-हरकत प्रमाणपत्र आणि आवश्यक कागदपत्रांची पूर्तता करून इच्छुकांनी ३१ ऑक्टोबरपर्यंत तहसील कार्यालयात अर्ज सादर करणे आवश्यक आहे. या मुदतीनंतर येणाऱ्या अर्जांचा किंवा अपूर्ण कागदपत्रांचा कोणताही विचार केला जाणार नसल्याचे प्रशासनाने स्पष्ट केले आहे.
विनापरवाना स्टॉलवर होणार जप्तीची कारवाई
नगरपालिका किंवा संबंधित ग्रामपंचायतीने निश्चित केलेल्या बिनशेती जागेवरच फटाका स्टॉल उभारणे बंधनकारक आहे. स्टॉलधारकांनी दुकानात अग्निशामक यंत्रे आणि सुरक्षा साधने सज्ज ठेवून परवान्याची प्रत दर्शनी भागात लावणे सक्तीचे आहे. अनधिकृतपणे विक्री करणाऱ्यांचे साहित्य जप्त करून कायदेशीर कारवाई करण्यात येणार असून, नागरिकांनी सुरक्षिततेची काळजी घेत फटाके फोडावेत, असे आवाहन करण्यात आले आहे.
