धुमाळवाडी: दुष्काळातही फुलली जांभळाची बाग; फडतरे बंधूंना १० लाखांच्या उत्पादनाची संधी
फळांचे गाव असलेल्या धुमाळवाडीत फडतरे बंधूंनी पाणीटंचाईवर मात करत १०० जांभूळ झाडांमधून तब्बल १० लाख रुपयांचे उत्पादन मिळवण्याची किमया साधली आहे.
स्थैर्य, फलटण, दि. २० जून : महाराष्ट्र राज्यात ‘फळांचे गाव’ म्हणून नावलौकिक मिळवलेल्या फलटण तालुक्यातील धुमाळवाडी येथील भगवान फडतरे आणि विष्णू फडतरे या शेतकरी बंधूंनी दुष्काळातही जांभूळ शेतीचा यशस्वी प्रयोग केला आहे. टँकरद्वारे पाणीपुरवठा करून जगवलेल्या या बागेतून त्यांना यावर्षी सुमारे १० लाख रुपयांचे उत्पन्न मिळण्याची अपेक्षा आहे.
पारस जातीच्या जांभळाची लागवड
फडतरे बंधूंनी काही वर्षांपूर्वी २२ गुंठे क्षेत्रावर १४ बाय १४ फूट अंतरावर गुजरातवरून आणलेल्या ‘पारस’ जातीच्या १०० जांभूळ कलमांची लागवड केली होती. ठिबक सिंचनाचा वापर करून त्यांनी पाण्याचे योग्य व्यवस्थापन केले. लागवडीनंतर चौथ्या वर्षी या बागेतून त्यांना पहिल्यांदा ३ टन उत्पादन मिळाले. या जांभळाला प्रतिकिलो २०० ते ३०० रुपये दर मिळाल्याने त्यांना सुरुवातीलाच ६ लाख रुपयांचे उत्पन्न मिळाले होते.
दररोज ३०० किलोचे उत्पादन
चालू वर्षी म्हणजेच पाचव्या वर्षी बागेत मोठ्या प्रमाणावर फळधारणा झाली आहे. जांभळाची तोडणी वेगात सुरू असून दररोज सुमारे ३०० किलो फळे मिळत आहेत. मुंबईच्या बाजारपेठेत या जांभळाला २०० रुपये प्रतिकिलो दर मिळत असून, दिवसाला तब्बल ६० हजार रुपयांची उलाढाल होत आहे. तोडणीसाठी कुटुंबातील ६ सदस्य आणि बाहेरचे ४ मजूर काम करत असल्याने मजुरीवरील खर्चात मोठी बचत होत आहे. या हंगामात १०० झाडांपासून एकूण ७ टन जांभळाचे उत्पादन आणि त्यातून १० लाख रुपयांचे उत्पन्न मिळण्याचा अंदाज फडतरे बंधूंनी व्यक्त केला आहे.
कृषी विभागाचे मार्गदर्शन
सध्या दुष्काळजन्य परिस्थिती आणि भीषण पाणीटंचाई असली तरी, फडतरे बंधू टँकरने पाणी विकत आणून ही बाग यशस्वीपणे जगवत आहेत. कृषी विभागाच्या ‘अल निनो’ अंतर्गत शिवार फेरी आणि कृषी सहाय्यक सचिन जाधव यांच्या मार्गदर्शनामुळे संरक्षित शेतीचा हा प्रयोग यशस्वी झाला आहे. तालुका कृषी अधिकारी दत्तात्रय गायकवाड यांच्यासह राज्यातील अनेक शेतकरी या बागेला भेट देऊन फडतरे बंधूंच्या या जिद्दीचे मोठे कौतुक करत आहेत.
