डॉ. नानासाहेब धर्माधिकारी प्रतिष्ठानची स्वच्छता मोहीम : फलटणच्या शासकीय कार्यालयांना स्वच्छतेचा स्पर्श
थेट WhatsApp वर मिळवा
दैनिक स्थैर्य | दि. 03 मार्च 2025 | फलटण | येथे डॉ. नानासाहेब धर्माधिकारी प्रतिष्ठानने स्वच्छता अभियान राबवले. या अभियानात प्रांत कार्यालय, तहसील कार्यालय, सार्वजनिक बांधकाम कार्यालय, दुय्यम निबंधक कार्यालय, दिवाणी व फौजदारी न्यायालय, उपजिल्हा रुग्णालय, फलटण ग्रामीण आणि पंचायत समिती कार्यालय या सर्व शासकीय कार्यालयाच्या परिसरात स्वच्छता केली गेली. यात 900 प्रतिष्ठानच्या सदस्यांनी भाग घेतला आणि 25 टन ओला व सुका कचरा संकलित करून फलटण नगरपालिकेच्या डम्पिंग ग्राउंडवर पोहोचवण्यात आला.
या अभियानात फलटण – कोरेगावचे आमदार सचिन कांबळे – पाटील, जिल्हा परिषदेचे माजी अध्यक्ष श्रीमंत संजीवराजे नाईक निंबाळकर, उपविभागीय अधिकारी विकास व्यवहारे, तहसीलदार डॉ. अभिजीत जाधव, दिवाणी व फौजदारी न्यायालयाचे मुख्य ज्ञानमूर्ती श्रीमती खेडकर – गोयल मॅडम, नगरपालिकेचे मुख्याधिकारी निखिल मोरे, उपजिल्हा रुग्णालय येथील वैद्यकीय अधिकारी डॉ. अंशुमन धुमाळ आणि सर्व शासकीय कार्यालयातील कर्मचारी यांनी सहभाग घेतला. या अभियानात फलटण नगरपालिकेने संपूर्ण सहकार्य केले. त्याचबरोबर, फलटण तालुक्यासह वाठार स्टेशन, लोणंद, निरा, धर्मपुरी, नातेपुते येथील सदस्यांनी उत्स्फूर्तपणे सहभाग घेतला. हे स्वच्छता अभियान प्रतिष्ठान मार्फत संपूर्ण देशभर व विदेशात राबविण्यात आले.
या स्वच्छता अभियानाची फलटणमधील सर्व स्तरातून कौतुक होत आहे. हे अभियान पर्यावरणाचा ध्यास आणि परिवर्तनाची आस या ध्येयाने कार्यरत असलेल्या प्रतिष्ठानच्या प्रयत्नांचा एक भाग आहे. यामुळे समाजात स्वच्छतेच्या महत्त्वाबद्दल जागरूकता निर्माण होत आहे आणि सार्वजनिक ठिकाणी स्वच्छता राखण्याची जबाबदारी नागरिकांना पटत आहे.
डॉ. नानासाहेब धर्माधिकारी प्रतिष्ठानच्या स्वच्छता अभियानाने फलटणच्या शासकीय कार्यालयांच्या परिसरात स्वच्छता राखण्याच्या दिशेने महत्त्वपूर्ण पाऊल उचलले आहे. हे अभियान समाजातील इतर संस्था आणि नागरिकांना प्रेरणा देणारे ठरेल. या प्रकारच्या उपक्रमांमुळे स्वच्छ भारत अभियानाच्या ध्येयाकडे वेगाने जाता येईल.
