फलटण: ३१ मतदारांनी बजावला हक्क; विधानपरिषद निवडणुकीत महायुती भक्कम
फलटण केंद्रावरील सर्व ३१ मतदारांनी मतदानाचा हक्क बजावला असून महायुतीचे उमेदवार धैर्यशील कदम यांचा विजय निश्चित मानला जात आहे.
स्थैर्य, फलटण, दि. १८ जून : सातारा-सांगली स्थानिक स्वराज्य संस्था विधानपरिषद मतदारसंघाच्या निवडणुकीसाठी फलटण तहसील कार्यालयातील मतदान केंद्रावर सर्व ३१ मतदारांनी आपल्या मतदानाचा हक्क बजावला आहे. यामध्ये भारतीय जनता पार्टी व राष्ट्रवादी काँग्रेस पार्टीचे २० नगरसेवक व १ नगराध्यक्ष, तसेच शिवसेनेचे १० नगरसेवक यांचा समावेश असून ही संपूर्ण प्रक्रिया शांततेत पार पडली.
वेळेनुसार मतदानाचे नियोजन
या निवडणूक प्रक्रियेत सकाळी ११ ते दुपारी १ या वेळेत शिवसेनेच्या १० नगरसेवकांनी मतदान केले. त्यानंतर दुपारी २ वाजता नगराध्यक्ष समशेरसिंह नाईक निंबाळकर यांच्या नेतृत्वाखाली भाजप आणि राष्ट्रवादी काँग्रेसच्या २० नगरसेवकांनी मतदानाचा हक्क बजावला. जिल्हा स्तरावरून शिवसेना आणि राष्ट्रवादीने भाजपला भक्कम पाठिंबा दिला असल्याने महायुतीचे पारडे जड झाले आहे.
नेत्यांकडून विजयाचा निर्धार
यावेळी समशेरसिंह नाईक निंबाळकर म्हणाले की, महायुतीमधील भाजपा व राष्ट्रवादीच्या नगरसेवकांनी फलटण केंद्रावर शंभर टक्के मतदान केले असून भाजपचे उमेदवार धैर्यशील कदम यांचा विजय आता निश्चित आहे. शिवसेनेचे स्वीकृत नगरसेवक श्रीमंत अनिकेतराजे नाईक निंबाळकर यांनीही पक्षाच्या आदेशाचे पालन करत सर्व शिवसैनिक महायुतीसोबत ठामपणे उभे असल्याचे स्पष्ट केले.
